U Rwanda, Malawi na Bahrain bagiye guhurira mu Irushanwa rya 'Tri-Nation Series'

U Rwanda rwatumiye Ibihugu bya Malawi na Bahrain, mu Irushanwa rya Tri-Nation Series.

Tri-Nation Series n'Irushanwa ry'umukino wa Cricket rikinwa n'amakipe yIgihugu y'abagabo, rikaba ritegurwa n'Ishyirahamwe ry'Umukino wa Cricket mu Rwanda, RCA.

Riteganyijwe gukinirwa ku Kibuga mpuzamahanga cya Cricket i Gahanga mu Karere ka Kicukiro mu Mujyi wa Kigali.

Umukino wa mbere uteganyijwe kuri uyu wa Gatanu tariki ya 18 Nyakanga [7] 2025, mu gihe uwa nyuma [Finale] izakinwa tariki ya 27 Nyakanga [7] 2025.

Kuri uyu wa Gatanu, u Rwanda ruzatangira iri rushanwa rucakirana n'Ikipe y'Igihugu cya Bahrain.

Bahrain n'Igihugu giherereye mu Burasirazuba bwo hagati, k'Umugabane w'Aziya.

Ni ku nshuro ya mbere kije gukinira mu Rwanda, ikaba iri ku mwanya wa 26 n'amanota 5952, k'urutonde rw'Impuzamashyirahamwe y'Umukino wa Cricket ku Isi, ICC.

Kuri uru rutonde, u Rwanda ruri k'umwanya wa 61 n'amanota 2056, mu gihe Malawi iri ku mwanya wa 52 n'amanota 1287.

Uru rutonde rukorwa hashingiwe ku mikino Igihugu kimaze gukina.

Imikino ya Tri-Nation Series yatangiye gutegurwa n'Ishyirahamwe ry'Umukino wa Cricket mu Rwanda guhera mu 2022.

Ku nshuro ya mbere, yitabiriwe n'Ibihugu by'u Rwanda, Uganda na Tanzaniya. Icyo gihe, iri rushanwa ryegukanywe n'Ikipe y'Igihugu ya Uganda.

Mu 2022, ryakiniwe ku Kibuga mpuzamahanga cya Cricket i Gahanga, rikinwa hagati ya tariki ya 13 na 23 Ukuboza [12].

Icyo gihe, hakinwe imikino 12, Uganda yegukana Igikombe nyuma yo gutsinda imikino 09.

Yakurikiwe na Tanzaniya yatsinze imikino 06, mu gihe u Rwanda rwatsinze umukino 01 gusa.

Iri rushanwa ryongeye gukinwa hagati ya tariki ya 20-31 z'Ukwezi kwa Kanama [8] mu 2023, n'ubundi ryitabirwa n'ibi bihugu, Uganda yongera kwegukana Igikombe.

Uganda yegukanye igikombe nyuma yo gutsinda imikino 11 muri 12 yakinwe, o1 ikaba ari uwo yatsinzwe na Tanzaniya.

Hari hashize Imyaka 2 ridakinwa, bivuze ku mu Mwaka ushize w'i 2024, ritabaye.

Kuri iyi nshuro, aya makipe y'Ibihugu uko ari 3, buri yose izahura n'indi ibizwi nka [Round Robin Games], Ikipe izatsinda imikino myinshi, ihite yegukana Igikombe.

Amafoto