Amakipe 21 ategerejwe mu Irushanwa mpuzamahanga ryo Kwibuka Jenoside yakorewe Abatutsi

Ishyirahamwe ry’Umukino wa Rugby mu Rwanda [RRF], ryateguye ‘Genocide Memorial Rugby 7s Tournament’, Irushanwa Mpuzamahanga ryo kwibuka ku nshuro ya 31 Jenoside yakorewe Abatutsi mu 1994.

Riteganyijwe kuri uyu wa Gatandatu tariki ya 21 Kamena 2025, rikazabera kuri Sitade Amahoro guhera ku Isaha ya saa tatu za mu gitondo [09:00].

Iri rushanwa rigiye gukinwa ku nshuro ya 11, biteganyijwe ko rizitabirwa n’Amakipe 21, arimo 14 y’Abagabo n’amakipe 07 y’Abagore.

Mu kiciro cy’abagabo, hateganyijwe Amakipe arimo: Lions De fer RFC, Kigali Sharks RFC, 1000 Hills Rugby, Alfa Kagugu RFC, Puma RFC, Muhanga Thunders RFC, Gitisi TSS, UR Grizzlies, Resilience RFC, Rwamagana Hippos RFC, Burera Tigers RFC, Rams RFC [Uganda], Juba Eagles [Sudani y’Epfo] na Kigezi Silverbacks [Uganda.

Mu kiciro cy’Abagore, hateganyijwe Amakipe arimo: Kamonyi Panthers Women RFC, Gitisi TSS, Resilience RFC, 1000 Hills Rugby, UR Grizzlies, Burera Tigers RFC na Kigezi Queens RFC [Uganda].

Umwaka ushize ubwo iri rushanwa ryakinwa ku nshuro ya 10, ryitabiriwe n’Amakipe 16 arimo 10 y’Abagabo n’Amakipe 06 y’Abagore.

Mu kiciro cy’Abagabo, Ikipe ya Rams RFC yegukanye Igikombe itsinze Lions de Fer 24-07, umwanya wa gatatu wegukanwa na Resilience RFC itsinze Kigali Sharks 19-00.

Mu kiciro cy’abagore, Kamonyi Panthers Women RFC yegukanye Igikombe itsinze Ruhango Zebras, mu gihe umwanya wa gatatu watwawe na Burera Tigers RFC itsinze Kigezi Queens RFC 05-00.

Genocide Memorial Rugby 7s Tournament, iteurwa n'Ishyirahamwe ry’Umukino wa Rugby mu Rwanda [RRF] ku bufatanye na Komite Olempike y'u Rwanda [RNOSC] mu rwego rwo guha icyubahiro Abatutsi bishwe muri Jenoside yakorewe Abatutsi mu 1994, by'umwihariko abari Abasiporotifu.