Taekwondo: Amakipe arenga 20 ategerejwe mu irushanwa mpuzamahanga ryo Kwibuka

Ishyirahamwe ry’umukino njyarugamba wa Taekwondo mu Rwanda ku bufatanye na Minisiteri ya Siporo ndetse na Komite Olempike, ryateguye irushanwa mpuzamahanga ryo kwibuka ku nshuro ya 32 Jenoside yakorewe Abatutsi mu 1994.

Muri uyu mwaka, rizitabirwa n’amakipe 25 arimo 4 yo mu gihugu cya Kenya.

Riteganyijwe mu mpera z’iki Cyumweru hagati ya tariki ya 13-14 Kamena (6) 2026.

Rikazakinirwa kuri Hill Top Hotel i Remera mu Mujyi wa Kigali.

Mu gihe u Rwanda rwibuka ku nshuro ya 32, iri rushanwa rigiye gukinwa ku nshuro yaryo ya 12.

Abakinnyi bakabakaba 250 bazarushanwa mu byiciro bitandukanye birimo icy’abatarengeje imyaka 15, icy’abatarengeje imyaka 18, icy’abafite imyaka iri hejuru ya 18 kuzamura ndetse n’ikiciro cy’abantu bafite ubumuga ‘Para Taekwondo’.

Umwaka ushize ubwo iri rushanwa ryakinwaga ku nshuro ya 11, ryegukanywe n’Ikipe ya Polisi y’u Rwanda.

Uretse amakipe yo mu Rwanda, ayo mu gihugu cya Kenya azaryitabira azaba agizwe n’Ikipe ya Faith Ogallo, Kakuma Refugees Team, Homabay County ndetse na Maseno University.

Mu gihe amakipe yo mu Rwanda azitabira iri rushanwa arimo ‘Police Taekwondo Club, Kaniga Taekwondo Club, Peace Light Taekwondo Club, Peace Fighters Taekwondo Club, Sure We Can Taekwondo, White Star Taekwondo Club, Kivu Development Taekwondo Club, Stars Taekwondo Club, Best First One Taekwondo Club, Jangwa Taekwondo Club, Dream Taekwondo Club, Urban Taekwondo Club, Light Taekwondo, Eagle Taekwondo Club, Flash Kicks, Taekwondo Club, Dream Fighters Taekwondo Club, Kiziba Taekwondo Academy, Mahama Taekwondo Academy ndetse na Gasabo Taekwondo Club.