Volleyball: Matheus yongewe mu ikipe y’Igihugu yitegura igikombe cy’Afurika

Umutoza w’Ikipe y’Igihugu y’u Rwanda y’abagabo, Frédéric Guérin, yongeye Matheus Bettim mu ikipe yitegura igikombe cy’Afurika kizakinirwa muri Repubulika ya Demokarasi ya Congo mu kwezi gutaha hagati ya tariki ya 7-21 Nzeri (9) 2026.

Matheus Bettim asanzwe akinira ikipe ya Police VC, n’ubwo umwaka ushize w’imikino yari yagiye gukina muri Shampiyona ya Brazil, Igihugu akomokamo.

Nyuma yo kumara umwaka w’imikino 2025-26 adakina Shampiyona y’u Rwanda, yagarutse muri Police VC muri Nyakanga (7) 2026, ayisinyamo amasezerano y’umwaka, nk’uko yari yabigenje ubwo yayizagamo ku nshuro ya mbere mu 2024-25.

Mu gihe abandi bari bamaze hafi Ibyumweru bibiri bakora imyitozo, byari byitezwe ko ayisangamo abandi kuri uyu wa gatatu tariki ya 12 Kanama (8) 2026.

Imyitozo itegura iri rushanwa, ikorwa muri NPC Gymnasium, i Remera mu Mujyi wa Kigali.

Uyu mukinnyi w’imyaka 24 y’amavuko, yongewe mu ikipe y’Igihugu mu gihe urugendo rwo kubona Ubwenegihugu bw’u Rwanda arurimbanyije.

Kugeza ubu, abakinnyi bari mu mwiherero ni 19, mu gihe biteganyijwe ko urutonde rwa nyuma bazaba ari 14.