RRA VC mu makipe azitabira Memorial Rutsindura 22, yahaye umwihariko abakiri bato

Ikipe y’Ikigo cy’Igihugu gishinzwe Imisoro n’Amahoro, RRA VC, iri mu makipe azitabira Irushanwa ryo kwibuka Alphonse Rutsindura ku nshuro ya 22.

ASEVIF (Association des Anciens Séminaristes de Virgo Fidelis) itegura iri rushanwa rizwi nka ‘Memorial Rutsindura’ yatangaje ko kuri iyi nshuro ya 22, abakiri bato bahawe umwihariko.

Guha umwihariko abakinnyi bakizamuka, byakozwe mu mujyo wo gufasha amakipe asanzwe akina muri Shampiyona y’ikiciro cya mbere kubona aho gukura abakinnyi mu buryo bworoshye, mbere y’itangira rya Shampiyona y’Umwaka utaha w’i 2026-27.

Imikino yo kwibuka Rutsindura iteganyijwe hagati ya tariki ya 22-24 Gicurasi (5) 2026, n’ubwo imikino y’amajonjora mu makipe yo mu mashuri yisumbuye yateganyijwe gukinwa hagati ya tariki ya 09-16 Gicurasi (5) 2026.

Uretse amakipe y’abakiri bato, biteganyijwe ko n’amakipe asanzwe akina Shampiyona y’ikiciro cya mbere mu bagore n’abagabo azaba yesurana, ndetse n’amakipe ahagarariye za Kaminuza.

Alphonse Nsengiyumva, umuvugizi wa komite ishinzwe gutegura iri rushanwa, avuga ko uyu Mwaka uzaba wihariye kandi abazitabira iri rushanwa bazanyurwa.

Ati:“Turi gukora ibishoboka byose ngo abakinnyi bakiri bato babone urubuga rwo kwiyereka amakipe akina ikiciro cya mbere. By’umwihariko, babengukwe n’amakipe akina imikino ihuza za Kaminuza, mu gihe baterekeje mu bigugu byo mu kiciro cya mbere”.

Yunzemo ati:“Mu marushanwa atandukanye ategurwa imbere mu gihugu, abakinnyi bakiri bato babura aho bigaragariza, ariko kuri iyi nshuro twabatekerejeho”.

Uretse amakipe yo mu kiciro cya mbere mu bagore n’abagabo, biteganyijwe ko iri rushanwa rizitabirwa n’amakipe akina Shampiyona ihuza za Kaminuza mu kiciro cy’abagabo, ay’Ibigo by’Amashuri yisumbuye ndetse n’ay’abanza, ay’abakanyujijeho ndetse n’ay’abakina Volleyball ikinirwa ku Mucanga.

Mu gihe yabura iminsi 10 ngo Irushanwa ritangire, kugeza ubu amakipe amaze kwemeza kuzaryitabira, arimo ‘Rwanda Revenue Authority (RRA), Rwanda Energy Group (REG), Gisagara VC ndetse n’amakipe yombi ya APR (APR VC & APR WVC)’.

Alphonse Nsengiyumva akomeza avuga ko kwiyandikisha bigikomeje, kugeza ku wa gatatu w’Icyumweru gitaha.

Umwaka ushize ubwo iri rushanwa ryakinwaga ku nshuro ya 21, Police VC yegukanye igikombe itsinze REG amaseti 3-1, mu gihe mu bagore APR WVC yatsinze RRA VC amaseti 3-0.

Alphonse Rutsindura wibukwa ku nshuro ya 22, yavuye mu cyahoze ari Komine Ndora ho mu Karere ka Gisagara y’ubu, mu 1958.

Kuri ubu, Ndora ni umwe mu Mirenge 13 igize Akarere ka Gisagara ho mu Ntara y’Amajyepfo.

Nyuma yo gusoza Amashuri abanza, yakomereje ayisumbuye muri Seminari ntoya ya Butate (Petit Séminaire de Karubanda), mbere yo gukomereza Amashuri makuru muri National Pedagogical Institute de Butare (IPN).

Nyuma yo kurangiza Amashuri, yagarutse muri Seminari ntoya ya Butare, yigishamo Amasomo ya Muzika n’Ikiratini.

Ibi yabifatanyije no gutoza Volleyball hagati y’Umwaka w’i 1983 kugeza mu 1994 ubwo yicwaga muri Jenoside yakorewe Abatutsi.

Muri Jenoside yakorewe Abatutsi, yicanwe n’Umugore we Verena Mukarubayiza ndetse n’abana.

Mu bana yari yarabye, harokotse Umwana umwe, Ikirezi, witabiriye iri rushanwa ryo kwibuka Umubyeyi we mu 2019.

Yatoje kandi Ikipe y’Igihugu y’Abagore ya Volleyball hagati y’Umwaka w’i 1988 n’i 1990, ndetse n’Ikipe ya Volleyball y’Abagore ya Rayon Sports mu 1990.

Uretse gutoza, Rutsindura yabaye Visi Perezida w’Ishyirahamwe rya Volleyball mu Rwanda (FRVB).

Amafoto

Alphonse Nsengiyumva ushinzwe gutegura ‘Memorial Rutsindura’ avuga ko abakiri bato bazahabwa umwihariko kuri iyi nshuro ya 22

Alphonse Rutsindura yatoje Seminari ntoya yo ku Karubanda hagati y’i 1983-1994.

Hagati y’Umwaka w’i 1988-1990, Rutsindura yatoje Ikipe y’Igihugu y’abagore.