Ikipe y'Igihugu y'Abagore yagiye kwitegurira Afrobasket mu Misiri

Ikipe y'Igihgu y'u Rwanda y'umukino wa Basketball mu Bari n'Abategarugoli, yerekeje i Cairo mu Misiri, mu rwego rwo kwitegura imikino ya nyuma y'Igikombe cy'Afurika [Afrobasket].

Iyi kipe yahagurutse ku Kibuga mpuzamahanga cy'Indege cya Kigali i Kanombe mu ijoro ryo kuri uyu wa Kane tariki ya 10 Nyakanga [7] 2025.

Biteganyijwe ko aha mu Misiri, izahakinira imikino ibiri ya gicuti n'Ikipe y'Igihugu ya Misiri, iyi mikino ikazakinwa hagati ya tariki ya 12-14 Nyakanga [7] 2025.

Imikino ya nyuma y'Igikombe cy'Afurika mu bagore, iteganyijwe hagati ya tariki ya 26 Nyakanga [7] n'iya 03 Kanama [8] 2025.

Izakinirwa mu Mujyi wa Abidjan mu gihugu cya Côte d'Ivoire, mu Nzu y'Imikino ya Palais des Sports Treichville.

Nyuma yo kuva mu Misiri, u Rwanda ruzahita rukomereza muri Côte d'Ivoire tariki ya 16 Nyakanga [7] 2025, ahazabera iyi mikino.

U Rwanda ruzakina umukino warwo wa mbere rucakirana n'Ikipe y'Igihugu ya Nigeria ari nayo ifite iri rushanwa, mbere yo kwisobanura n'Ikipe y'Igihugu ya Mozambique tariki ya 27 Nyakanga [7] 2025.

Muri iyi mikino, Ikipe ya mbere muri buri tsinda, izahita ikatisha itike ya ¼, mu gihe amakipe azaba yabaye aya kabiri n'aya gatatu, azakina imikino yo kwishakamo asanga ayageze muri ¼.

Mu gihe amakipe agabanyije mu matsinda 4, amakipe azatsindirwa mu mikino ya ¼, azakina imikino yo guhatanira imyanya hagati y'uwa 9 n'uwa 12.

Ikipe y'Igihugu y'u Rwanda itozwa n'Umunya-Senegal, Cheikh Sarr, yerekeje mu Misiri idafite Bella Murekatete, ukinira Boulangère Wonderligue yo mu Bufaransa.

Gusa, biteganyijwe ko ntagihindutse, azasanga iyi kipe mu Misiri, bagafatanya urugendo rwo kwitegura Afrobasket.

Abakinnyi b'Ikipe y'Igihugu berekeje mu Misiri bagizwe na:

• Odile Tetero
•  Philoxy Destiney
• Faustine Mwizerwa
• Rosine Micomyiza
• Gloriose Byukusenge
• Violette Uwimpuhwe
• Vanessa Camara
• Sifa Ineza Joyeuse
• Ange Nelly Irakoze
• Jean Baptiste Irakoze
• Hampton Keisha
• Assouma Uwizeye
• Hope Butera 
• Rebecca Cyuzuzo.

Amafoto