Amafoto: APR yahize andi makipe yitabiriye 'Kigali City Open Karate Championship'

Ikipe y'Ingabo z'u Rwanda mu Mukino njyarugamba wa Karate, APR Karate Team, yegukanye Kigali City Open Karate Championship.

Iri rushanwa ryakinwaga ku nshuro yaryo ya mbere, ryabaye kuri iki Cyumweru tariki ya 13 Nyakanga 2025, rikinirwa muri Gymnasium ya Golden Gala Hotel, mu Karere ka Kicukiro mu Mujyi wa Kigali.

Ryateguwe n'Ubuyobozi bw'umukino wa Karate muri Zone y'Umujyi wa Kigali, ryitabirwa n'Abakarateka hafi 100 mu byiciro byombi, abagore n'abagabo, bavuye mu makipe 10 atandukanye y'imbere mu gihugu.

APR Karate Club yaryegukanye nyuma yo gukusanya Imidali 7 irimo 2 ya Zahabu, 2 ya Silver n'indi 3 ya Bronze.

Yakurikiwe n'Ikipe ya Sinzi Karate Do Academy, yegukanye Imidali 2 ya Zahabu.

Umwanya wa gatatu, wegukanywe n'amakipe abiri agizwe n'Ikipe ya Polisi y'Igihugu mu mukino wa Karate [Police Karate Club] n'Ikipe ya Zanshin Karate Academy yo mu Karere ka Huye mu Ntara y'Amajyepfo, nyuma y'uko zombi zegukanye Imidali 4, irimo 1 wa Zahabu, 2 ya Silver n'undi 1 wa Bronze.

Nyuma yo kwegukana iri Rushanwa, Umutoza w'Ikipe ya APR Karate Club, Sensei Mbarushimana Eric, mu kiganiro n'Itangazamakuru yagize ati:“Ndashimira abakinnyi uburyo bitanze batizigamye, cyane ko Ikipe itari yuzuye nk'uko bisanzwe, kuko bamwe mu bakinnyi bacu bari mu Ikipe y'Igihugu yitegura Shampiyona ny'Afurika”. 

Yakomeje agira ati:“Buri mukinnyi wa APR Karate Club, azi neza ko atayikinira kubera amahirwe, ahubwo agomba kuba abiwiriye, bityo ibi bikaba aribyo byaduhaye intsinzi”. 

Yasoje agira ati:“N'ubwo muri Karate utavuga ko hari Ikipe yoroha ibamo, arimo muri iri Rushanwa, Ikipe ya The Great Warriors yatugoye, bityo kwegukana iki gikombe tuyitsinze, ni bimwe mu byadushimishije”.

Kigali City Open Karate Championship yakurikiranwe n'Umuyobozi w'Ishyirahamwe rya Karate mu Rwanda, Niyongabo Damien, wavuze ko kuba amakipe ubwayo asigaye ategura amarushanwa bidahariwe Ishyirahamwe [Federasiyo] gusa, ari ikimenyetso cy'ejo hazaza h'iterambere ry'Umukino wa Karate mu Rwanda.

Ati:“Nk'ubuyobozi bwa Karate mu Rwanda, twanyuzwe n'uburyo iri rushanwa ryagenze, kandi n'iby'agaciro ku bariteguye no ku bakinnyi baryitabiriye. Turasaba n'abandi bakaratika bafite amakipe mu gihugu hose, gukomeza gutegura amarushanwa, ku buryo byibuze buri Kwezi hazajya hakinwa amarushanwa, aho kwishyiramo ko Umukino wa Karate ukinirwa mu Mujyi gusa”.

Yasoje agira ati:“Kuba amarushanwa akinwa nk'ubuyobozi bw'Ishyirahamwe tukaza gushyigikira abayateguye, n'inshingano zacu, kuko Abakarateka nibo dukorera, tuzakomeza gukora ibishoboka byose ngo amarushanwa yiyongere hagamijwe ko Umukino wa Karate ukomeza gutera imbere, haba mu Rwanda, mu Karere no ku Isi muri rusange”.

Umuyobozi ushinzwe guhuza ibikorwa bya Karate mu Mujyi wa Kigali, Sensei Nkurunziza Claude uzwi nka Maître Gasatsi, yavuze ko banyuzwe n'ubwitabire cyane ko byari ku nshuro ya mbere, yizeza ko muyandi marushanwa ari imbere, umubare w'abitabira uzakomeza kwiyongera kurushaho.

Ati:“N'ubwo byari ku nshuro ya mbere, twishimiye uburyo iri rushanwa ryagenze. Abaryitabiriye berekanye urwego rushimishije, ndetse n'imisifurire yifashishije Ikoranabuhanga, ni kimwe mu byaryongereye uburyohe”.

Yakomeje agira ati:“Twatangiye uburyo bwo gushyira Umukino wa Karate y'u Rwanda ku rwego mpuzamahanga, aho umuntu uza kuwureba abyishyurira, kandi mwabonye ko bishoboka, bityo turifuza ko bizakomeza”.

Muri iri rushanwa, hashimiwe Maître Sinzi Tharcisse, ku ruhare yagize mu guteza imbere umukino wa Karate mu Rwanda, by'umwihariko no kuba Ikipe ye yazanye abakinnyi bari mu begukanye Imidali ya Zahabu.

Amakipe 10 yitabiriye iri rushanwa yakurikiranye mu kwegukana Imidali buryo bukurikira:

• APR Karate Club, Imidali 7
• Sinzi Karate Do Academy, Imidali 2
• Zanshin Karate Academy, Imidali 4
• Police Karate Club, Imidali 4
• Zen Karate Club, Imidali 2
• Kamikaze Karate Do, Imidali 2
• Flying Eagles, Imidali 2
• Shisei Karate Do Club, Imidali 2
• Hero Karate do Club Rafiki, Imidali 2
• The Great Warriors, nta Mudali
• Kigali Karate Academy, nta Mudali.

Ishyirahamwe ry'umukino wa Karate mu Rwanda, ryahisemo gushyiraho ibyerekezo [Amazone], mu rwego rwo gufasha Abakaratika kubona imikino myinshi hafi yabo no kugera aho imikino ibera bitabagoye.

Amafoto