Rwanda: Ingabire Victoire yafunzwe
Ingabire Umuhoza Victoire w'Imyaka 57 y'Amavuko, yatawe muri Yombi n'Urwego rw’Igihugu rw’Ubugenzacyaha [RIB].
RIB yavuze ko yamutaye muri yombi tariki 19 Kamena [6] 2025,
Akurikiranyweho ibyaha bitandukanye birimo kurema umutwe w’abagizi ba nabi n’ibindi.
RIB yakomeje ivuga ko yatawe muri yombi kugira ngo hashyirwe mu bikorwa icyemezo cy’Urukiko Rukuru, mu rubanza ruregwamo uwitwa Sibomana Sylvain na bagenzi be.
Muri uru rubanza, Urukiko Rukuru rwasabye Ubushinjacyaha gukora iperereza ryimbitse ku byaha aregwamo na bagenzi be.
Kuri uyu wa Kane mu Rukiko byagenze bite
Victoire Ingabire, ufite Ishyaka ritemewe n'amategeko mu Rwanda, yabwiye urukiko ko benshi mu baregwa gushaka guhirika ubutegetsi badakoresheje intambara abazi ariko ko we, cyangwa ishyaka rye, atigeze ategura amahugurwa yo gukora icyo gikorwa bashinjwa.
Urukiko rwavuze ko amakuru Ingabire yatanze adahagije, rutegeka ko akorwaho iperereza kuko rubona hari ibimenyetso bimushinja.
Ku wa kabiri w'iki cyumweru ni bwo Urukiko Rukuru rwategetse Victoire Ingabire kwitaba akabazwa mu rubanza rw'abantu icyenda barimo Umunyamakuru Théoneste Nsengimana n'uwitwa Sylavain Sibomana bavuga ko yari abayoboye, bafunze kuva mu 2021.
Mu gushinja abaregwa, ubushinjacyaha bwagiye bugaruka kuri Ingabire, buvuga ko yagize uruhare runini mu gutegura ayo mahugurwa, ari na yo ntandaro yo kumutumiza mu rukiko uyu munsi.
Mbere yo kugira icyo avuga, umucamanza mu ijwi ryumvikanamo kworoshya, yabanje kubwira Ingabire ngo yiyumve nk'umuntu "ugiye gutanga amakuru asabwa n'urukiko" ngo ntiyiyumve nk'umuntu uregwa urimo kwisobanura.
Victoire Ingabire, wari kumwe n'umunyamategeko we Me Gatera Gashabana, yavuze ko benshi mu baregwa muri uru rubanza abazi ariko ko nta kintu yigeze afatanya na bo kijyanye no gutegura amahugurwa, kandi ko ayo mahugurwa atayazi.
Yavuze ko we ubwe cyangwa ishyaka rye ntaho bahuriye n'ariya mahugurwa yo guhirika ubutegetsi biciye mu nzira zitari intambara.
Yavuze ko ishyaka rye DALFA-Umurinzi ntaho rihuriye na yo kuko atari ishyaka ryemewe kandi ko umuhate wose yagerageje ngo ryemerwe ntacyo wagezeho, ati: "Iryo shyaka ntiryari kugira icyo rikora kandi ritariho mu buryo bwemewe n'amategeko".
Gatera Gashabana yavuze ko umukiriya we yagiye ahura n'inzitizi, n'ingorane mu kwandikisha ishyaka rye, ritemewe n'ubu.
Ingabire yabwiye Urukiko ko amaze kubona ko arimo kugorwa no kwandikisha ishyaka rye, yasabye komite y'agateganyo yari yashyizeho guhagarika ibikorwa byose byo gushakisha abayoboke.
Mu gushinja abaregwa, ubushinjacyaha bwagiye buhuza ayo mahugurwa n'umunsi witwa Ingabire Day wizihizwa buri mwaka na bamwe mu banyarwanda baba hanze bashyigikiye uyu munyapolitike.
Mu rukiko uyu munsi, Ingabire yavuze ko amahugurwa avugwa n'umunsi wa Ingabire Day ntaho bihuriye, ko uwo munsi utegurwa n'Abanyarwanda baba hanze kandi we nta ruhare agira mu kuwutegura uretse ko ngo asabwa gutanga ubutumwa kuri uwo munsi.
Nyuma yo kumva Ingabire, abacamanza bavuze ko bagiye kwiherera bakareba niba amakuru abahaye n'ibisobanuro bakeneye bihagije.
Nyuma yo kwiherera, abacamanza bagarutse bavuga ko basanze ibisobanuro Victoire Ingabire yatanze bidahagije, ko hari ibimenyetso bimushinja uruhare mu byaha abandi bakekwaho ko bakoze.
Urukiko rwategetse ubushinjacyaha gukora iperereza mu byumweru bibiri Ingabire akinjizwa muri uru rubanza nk'umwe mu baregwa.
Urukiko rwavuze ko uru rubanza ruzakomeza tariki 07 Nyakanga [7] 2025.
Ingabire yafunzwe mu 2010 ubwo yari amaze iminsi ageze mu Rwanda aje kwiyamamaza mu matora ya perezida yari ateganyijwe, yaraburanishijwe ahamwa n'ibyaha birimo kugambanira igihugu agamije kukibuza umudendezo no kurema umutwe w'abagizi ba nabi.
Ibyaha we yahakanye avuga ko bishingiye ku mpamvu za politike.
Kuri uyu wa Kane, nibwo Ingabire yari yitabye Urukiko, agiye gutanga amakuru. (Ifoto/ Courtesy)
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
