Handball: Umutoza w'u Rwanda yavuze ko umusaruro w'Igikombe cy'Afurika ushingiye kuri Shampiyona idakomeye

Umutoza w'Ikipe y'Igihugu y'u Rwanda ya Handball, Hafedh Zouabi, yavuze ko ukwitwara nabi mu mikino y'Igikombe cy'Afurika iri gukinirwa i Kigali, bishingiye kuri Shampiyona idakomeye.

Zouabi yavuze ko hakwiriye kugira igikorwa hakazamurwa urwego rwa Shampiyona, kuko urw'iriho kuri ubu, ari imbogamizi ku Ikipe y'Igihugu mu gihe yaserutse mu marushanwa mpuzamahanga.

Yabigarutse nyuma y'uko Ikipe y'Igihugu inaniwe no kurenga umutaru mu itsinda rya mbere yari isangiye n'Ibihugu birimo “Zambia, Nijeria na Algeria”.

Mu mikino itatu u Rwanda rwakinnye, rwatsinzwemo ibi, Algeria na Nigeria, mu gihe rwatsinze umwe gusa, waruhuje na Zambia.

Uyu musaruro, yawufashe nk'udashimishije by'umwihariko ku Ikipe yari imbere y'abafana bayo.

N'ubwo uyu mutoza mpuzamahanga w'Umunya-Tunizia avuga ibi, ntawakwirengiza ko u Rwanda ari inshuro ya kabiri rukinnye iyi mikino, mu gihe iri gukinwa ku nshuro ya 27.

Ubwo rwakinaga iyi mikino yakiniwe mu Misiri ku nshuro ya 26, u Rwanda rwasoreje ku mwanya wa 14 mu makipe 16 yari yayitabiriye.

Bitandukanye n'umusaruro wo mu Misiri, u Rwanda rwari rufite intego yo kwitwara neza kurushaho (Kurenga amatsinda), cyane ko imikino iri kubera i Kigali.

Akomoza kuri uyu musaruro, Hafedh Zouabi yagize ati:“Urwego rwa Shampiyona, ntacyo rwafashije Ikipe muri aya marushanwa. Ni Shampiyona iri ku rwego rwo hasi, ku buryo ntacyo yafasha Ikipe y'Igihugu”.

Yunzemo ati:“Amakipe abiri (APR HC na Police HC) niyo ahora ahanganye gusa. Imikino myinshi itandukanywa n'amanota ari hejuru y'icumi (10), ibi bigaragarira buri wese”.

Ku Myaka isaga 30 y'ubunararibonye muri Handball, Zouabi, yasabye abo bireba gukora ibishoboka, Shampiyona igakomera ndetse n'abakinnyi bakajya gukina ku rwego mpuzamahanga.

Kuri iyi ngingo, yavuze ko by'umwihariko mu mikino bahuyemo n'amakipe arimo “Algeria na Nigeria”, bagowe no guhura n'abakinnyi bakina ku rwego mpuzamahanga.

N'ubwo yanenze urwego rwa Shampiyona, Zouabi, yashimiye abakinnyo 16 yatoranyoje ngo bakine iyi mikino, avuga ko batanze byose bari bafite.

Ibyatangajwe na Zouabi byunzwemo na Kapiteni w'Ikipe y'Igihugu y'u Rwanda, Peter Kwisanga, ukina nk'Umunyezamu. 

Yagize ati:“Birashoboka ko Shampiyona yacu hari urwego itadufasha kugeraho. Ni Shampiyona byorohera buri umwe, gukeka amakipe azagera ku mukino wa nyuma. Ibi bibera inzitizi abakinnyi, bakananirwa gukora bivuye inyuma cyane ko n'ubundi baba bizeye ko amakipe yabo (APR HC na Police HC) azakina umukino wa nyuma (Finale).

Akomoza ku musaruro w'iri rushanwa, Kwisanga yavuze ko guhura n'amakipe y'Ibihugu afite abakinnyi bakina muri za Shampiyona zo ku rwego mpuzamahanga, byababereye inzitizi.

Ati:“Ukibona urwego abakinnyi ba Algeria bakinaho, uhita ucika intege mutaranahura. Benshi muri twe, guhura n'abakinnyi bakomeye nk'aba nta bunararibonye tubifitemo. Ibi ni kimwe mu byatugoye”.

Kwisanga usanzwe ari Umunyezamu w'Ikipe ya Polisi y'Igihugu (Police HC), yaboneyeho gusaba inzego bireba, gutegura amarushanwa menshi kandi arimo amakipe akomeye, bityo bikazafasha u Rwanda kwitwara neza mu marushanwa yo mu Myaka iri imbere.

Mu gihe u Rwanda rwasezererwaga, amakipe arimo “Egypt, Tunisia, Algeria, Angola, Morocco, Nigeria na Cape Verde”, yakatishije itike ya kimwe cya kane (¼).

Nyuma yo gusezererwa mu mikino y'amatsinda, u Rwanda rwerekeje mu mikino yo guhatanira imyanya hagati y'i 1 na 16.

N'imikino rwatangiye neza, aho rwisasiye Ikipe y'Igihugu ya Uganda ruyitsinze ibitego 37 kuri 27. (The Newtimes)