Rwanda: Ikipe y'Igihugu ya Handball yahamagariwe kwitegura Igikombe cy'Afurika

Ikipe y'Igihugu y'u Rwanda mu mukino wa Handball, yahamagaye abakinnyi 28 mu kwitegura Imikino y'igikombe cy'Afurika kizakinirwa i Kigali.

Iyi mikino iteganyijwe gukinirwa muri BK-Arena na Petit Stade Amahoro, hagati ya tariki ya 21 na 31 Mutarama (1) mu mwaka utaha (2026).

Abakinnyi 28 bahamagawe, biganjemo abakinnyi mikino y'Igikombe cy'Isi cy'abatarengeje imyaka 20, cyakiniwe i Kosovo muri Werurwe (3) y'uyu Mwaka, ndetse n'abakinnye icy'abatatengeje Imyaka 19 cyakiniwe muri Croatia mu Mwaka ushize.

Izatozwa n'Umunya-Tuniziya, Hafedh Zouabi uzaba afatanyije na Bagirishya Anaclet, usanzwe utoza Ikipe ya APR HC.

Hashize Imyaka ikabakaba 3 u Rwanda rwemerewe kwakira iri rushanwa ry'abakinnyi bakuru, ryaje rikurikira iry'Ingimbi rwakiriye mu Myaka 2 ishize.

Imikino y'Igikombe cy'Afurika yatangiye gukinwa mu 1974, yegukanwa n'Ikipe y'Igihugu ya Tuniziya. Icyo gihe, yakiniwe muri Algeria.

Umwaka ushize ubwo iri rushanwa ryakinwaga ku nshuro yaryo ya 26, ryakiniwe mu Misiri, ndetse iki gihugu kiraryegukana.

Mu nshuro 26 rimaze gukinwa, Ikipe y'Igihugu ya Tuniziya niyo imaze kuryegukana kenshi (10).

Misiri iri ku mwanya wa kabiri n'Ibikombe (9), mu gihe Algeria ari iya 3 n'ibikombe (7).

Aya makipe uko ari 3, niyo asimburana mu kwegukana iri rushanwa, kuko nta kindi gihugu kirabasha gukoramo.

Ikipe y'Igihugu ihamagawe mu gihe hamaze gukinwa imikino 4 ya Shampiyona. 

Urutonde ruyobowe n'Ikipe ya APR HC n'amanota 8 inganya na Gicumbi HT, mu gihe UR Huye na UR Rukara ziri ku mwanya wa nyuma, nta mukino n'umwe ziratsinda.

Ni mu gihe Ikipe ya Polisi y'Igihugu, Police HC, itarakina umukino n'umwe, bitewe n'uko Shampiyona yatangiye, irimbanyije imyiteguro y'imikino ny'Afurika y'amakipe yatwaye ibikombe iwayo, yakiniwe muri Maroke, mu ntangiriro z'uku Kwezi.

Twibutse ko u Rwanda rumaze kwitabira iyi mikino inshuro imwe (1), aho rwitabiriye imikino y'umwaka ushize yakiniwe muri Misiri.

Iyi mikino yakinwe hagati ya tariki ya 17-27 Mutarama (1) 2024, yitabiriwe n'Ibihugu 16, bikaba byari no ku nshuro ya mbere ryitabirwa n'umubare mwinshi.

Ntagihindutse, byitezwe ko imikino izakinirwa i Kigali, ishobora kuzakuraho aka gahigo, cyane ko u Rwanda rumaze kwigarurira imitima y'abakunzi ba Siporo muri Afurika no ku Isi muri rusange, ku bijyanye no kwakira amarushanwa mpuzamahanga, mu mikino itandukanye.

Abakinnyi bahamagawe baganjemo ab'Ikipe ya APR HC na Police HC.