AMAFOTO: Hafedh Zouabi yagizwe Umutoza w'Ikipe y'Igihugu y'u Rwanda ya Handball

Ishyirahamwe ry'Umukino wa Handball mu Rwanda (FERWAHAND), ryatangaje Umunya-Tuniziya, Hafedh Zouabi, nk'umutoza mushya w'Ikipe y'Igihugu y'abagabo mu gihe cy'imyaka 2 iri imbere.

Ni ukuvuga ko uyu Mugabo w'Imyaka 64, azatoza iyi Kipe kugeza mu 2027, ntagihindutse.

Kamwe mu kazi k'ibanze kamutegereje, karimo imikino ya nyuma y'Igikombe cy'Afurika mu kiciro cy'abagabo, giteganyijwe kubera i Kigali mu Mwaka utaha (2026), hagati ya tariki ya 21-31 Mutarama (1).

Nyuma yo gushyira umukono ku masezereno yasinyiwe imbere y'Umuyobozi wa FERWAHAND, Twahirwa Alfred, Zouabi yahise atangira izi nshingano.

Yatangiranye n'imyoitozo y'Ikipe y'Igihugu, yakorewe muri Petit Stade Amahoro i Remera mu Mujyi wa Kigali, ku mugoroba wo kuri uyu wa 31 Ukwakira (10) 2025.

Zouabi ni Umutoza w'inararibonye ku mugabane w'Afurika, cyane ko mbere yo kwerekeza i Kigali, yatozaga Ikipe y'Igihugu ya Tuniziya.

Yatangiye gukina umukono wa Handball mu 1977, atangirira mu Ikipe ya JS Kairouan.

Guhera mu Myaka ya 1980, yashimangiye ubuhangange bwe, nk'Umukinnyi w'Ikipe y'Igihugu nkuru ya Tuniziya.

Hagati y'Umwaka w'i 1983 n'i 1984, yakiniye Ikipe ya Club Africain yo muri Tuniziya, yegukanamo ibikombe bitandukanye.

Mu mpera z'i 1980, Zouabi yahagaritse gukina nk'Umunyamwuga, yinjira mu kazi k'Ubutoza mu ntangiriro z'i 1990.

Mbere yo gutangira gutoza Ikipe z'Igihugu, Zouabi usanzwe ufite Impamyabumenyi yo kwigisha Siporo muri Kaminuza n'iyo gutoza Umukino wa Handball, yanyuze mu makipe atandukanye arimo ayo mu bihugu bya Yorudaniya (Jordania) na Tuniziya (Tunisia).

Nk'umutoza w'Ikipe y'Igihugu ya Tuniziya, yayifashije kubona itike y'Imikino Olempike yo mu 2016, yakiniwe i Rio mu gihugu cya Brazil. Muri iyi mikino, Tuniziya yegukanyemo umwanya wa 12.

Mu 2017, yari umutoza w'Ikipe y'Igihugu ya Tuniziya yakinnye imikino ya Shampiyona y'Isi, isoreza ku mwanya wa 19.

Amafoto

Twahirwa Alfred na Hafedh Zouabi, nyuma yo gushyira umukino ku mwasezerano

Hafedh Zouabi yitezweho kuzafasha Ikipe y'Igihugu y'u Rwanda kwitwara neza mu mikino y'Igikombe cy'Afurika, giteganyijwe muri Mutarama y'i 2016