Imyiteguro ya GMT 2025 irarimbanyije: Amakipe yaremye isoko rya Kenya, Uganda, Tanzaniya na Nijeriya

THEUPDATE

Jun 19, 2025 - 13:00

Imyiteguro ya GMT 2025 irarimbanyije: Amakipe yaremye isoko rya Kenya, Uganda, Tanzaniya na Nijeriya

Mu gihe bucya hatangira Irushanwa ryo kwibuka ku nshyuro ya 31 Jenoside yakorewe Abatutsi mu 1994 binyuze mu mukino wa Volleyball, amakipe yo mu Rwanda azakina iri rushanwa yiyubatse mu buryo bukomeye.

kuri iyi nshuro, isoko ryo mu bihubu bya Kenya, Uganda na Nijeriya niryo ryaremwe mu rwego rwo kwitegura birushijeho iri rushanwa.

Amakipe ya: APR WVC, APR VC, Kepler WVC, REG VC, RRA VC n'ayandi, ari muyongeyemo abakinnyi, hashingiwe ko amategeko agenga iri rushanwa yemerera amakipe gukoresha abakinnyi batakoreshejwe mu mwaka w'imikino.

APR WVC

Ikipe ya APR y'abagore [APR WVC] , yiyubatse ihereye mu batoza, aho yazanye Umutoza w'Umunyakenya, Paul Gitau ngo akorane na Peter Kamasa usanzwe ari Umutoza mukuru.

Yasinyishije kandi abakinnyi barimo: Pamela Adhiambo Owino na Sharon Chepchumba bombi bakinira Ikipe y'Igihugu ya Kenya.

Paul Gitau n'Umutoza ufite ibigwi muri aka Karere by'umwihariko mu gutoza amakipe y'abagore.

Azwi cyane mu Ikipe ya Kenya Pipeline, aho yanayifashije kwegukana Igikombe cy'Irushanwa ry'Akarere ka Gatanu [CAVB Zone 5] ryakiniwe mu Rwanda mu 2023, atsinze RRA VC amaseti 3-1 ku mukino wa nyuma.

Uretse Kenya Pipeline, yatoje kandi Ikipe ya Kenya Commercial Bank [KCB, ndetse n'Ikipe y'Igihugu y'abagore ya Kenya izwi nka [Malkia Strikers].

Ubunararibonye bwe kandi, bushingiye ku kuba yaregukanye Umudali wa Zahabu mu 2015 mu mikino ny'Afurika [All African Games] yo ku nshuro ya 11 yakiniwe i Brazzaville.

Nk'Umutoza wa Kenya Pipeline kandi, muri uyu Mwaka [2025] yegukanye Umudali wa Bronze muri Shampiyona ny'Afurika yakiniwe muri Nijeriya.

Sharon Chepchumba asanzwe akinira Ikipe ya Edremit Bld yo mu gihugu cya Turukiya.

Nk'Umukinnyi w'Ikipe y'Igihugu ya Kenya, mu Mwaka ushize [2024], yitabiriye Imikino Olempike yo mu Mpeshyi yakiniwe i Paris mu Bufaransa.

Pamela Adhiambo Owino we asanzwe akinira Ikipe ya LP Viesti yo mu gihugu cya Finland. Uyu nawe yari mu Ikipe yakinnye Imikino Olempike.

Aba bakinnyi baje gufasha APR WVC mu gihe izaba idafite Umunyabotswanakazi, Gaoleseletse Lizzy wavunitse.

Biravugwa kandi ko abakinnyi bayo b'inkingi za mwamba, Munezero Valentine na Mukandayisenga Benitha bashobora kutayikinira muri iri rushanwa, kuko bashobora kujya guhagararira Igihugu mu Shampiyona ny'Afurika ya Volleyball ikinirwa ku Mucanga, itagenyijwe kubera muri Maroke guhera ku wa Mbere w'Icyumweru gitaha tariki ya 23 Kamena [6] 2025.

APR VC

Mu gihe Ikipe y'abagore yiyubakaga, iy'abagabo nayo ntabwo yasigaye.

APR VC yerekeje muri Ghana, ihakura Abdul-Hameed Ibrahim nawe utegerejwe muri iri rushanwa.

Mu mpera z'Icyumweru gishize, Abdul-Hameed Ibrahim yakinanye na mugenzi we wo muri Ghana, Paul Akan ubwo hakinwa umunsi wa nyuma wa Shampiyona ya Volleyball ikinirwa ku Mucanga.

Uyu munsi wakiniwe mu Karere ka Rubavu ku Mucanga w'Ikiyaga cya Kivu, wegukanwe n'aba bakinnyi bombi mu kiciro cy'abagabo.

N'ubwo bivugwa ko Abdul-Hameed Ibrahim usanzwe ukina muri Tuniziya ashobora gukinira APR VC muri iri rushanwa, THEUPDATE ifite amakuru ko ntagihindutse, we na Paul Akan bashobora kutazakina iyi mikino, kuko bazajya guhagararira Ikipe y'Igihugu cyabo [Ghana] muri Shampiyona ny'Afurika ya Volleyball ikinirwa ku Mucanga, itagenyijwe kubera muri Maroke guhera ku wa Mbere w'Icyumweru gitaha tariki ya 23 Kamena [6] 2025.

REG VC

Ikipe y'Ikigo cy'Igihugu cy'Ingufu, yasinyishije Umunya-Uganda, Sam Engwau, uyu akaba akina hagati [Middle Blocker].

Iyi igihe gukinwa iri rushanwa itari kumwe na Jean Patrice Ndaki Mboulet wayitoje muri Shampiyona irangiye [2024-25].

Nyuma yo gutandukana REG VC, Umunyakameroni Ndaki Mboulet yekereje muri Kepler VC.

REG VC kandi izaba itari kumwe n'Umunya-Brazil, Mathaus Wojtylla Mesquita wayikiraga nk'Umupaseri [Setter].

Mu rwego rwo kuziba iki cyuho, yasinyishije Benon Bavuga Mugisha, Umutoza w'Umugande watozaga Ikipe ya Sports-S, uyu bikaba ari inshuro ya kabiri yari ayigarutsemo, kuko yayitoje ku nshuro ya mbere hagati ya 2017-2019, anayihesha Igikombe cya Shampiyona mu 2018.

Undi mukinnyi mushya uzagaragara muri REG VC ni Crispin Ntanteteri.

Uyu mugabuzi w'Imipira [Setter], yasinyiye REG VC nyuma yo gusoza amasezerano y'Imyaka ibiri [2] yari afitanye na Police VC.

Police WVC

Iyi kipe ya Polisi y'Igihugu [RNP], yiyongereye imbaraga mbere yo gukina iri rushanwa isinyisha Umunyakenyakazi, Merline Terry.

Merline Terry asanzwe akinira Ikipe ya Kenya Commercial Bank [KCB], yanafashije kwegukana Shampiyona mu 2022.

Kepler WVC

Iyi Kipe ya Kaminuza ya Kepler ishami ryo mu Rwanda, yiyongereyemo imbaraga isinyisha Umunyakenyakazi, Violet Makuto.

Violet Makuto akinira Ikipe ya Kenya Pipeline kuva mu Mwaka ushize w'i 2024.

Aje mu Rwanda ahasanga Umuvandimwe we [Musaza we], Elphase Makuto ukinira Ikipe Police VC.

Mu gihe abagore biyubakaga, abagabo nabo ntabwo basigaye inyuma, kuko Ikipe ya Kepler VC yagaruye Umunyasudani y'Epfo, Galdet Maguong Mongom wari waragiye gukina muri Shampiyona ya Tuniziya, ndetse inasinyisha Umutoza mushya, Jean Patrick Ndaki watandukanye na REG VC, asimbuye Nyirimana Fidel.

Urertse aya makipe, THEUPDATE ifite amakuru ko Ikipe y'Ikigo cy'Igihugu cy'Imisoro n'Amahoro [RRA], RRA VC yasinyishije umukinnyi ukomoka muri Nijeriya, mu gihe Ikipe ya EAUR VC yasinyishije Umutanzaniya.

Iri rushanwa riteganyijwe gutangira kuri uyu wa Gatanu tariki ya 20 kugeza ku Cyumweru ku ya 22 Kamena [6] 2025, rikazakinirwa muri Petit Sitade Amahoro i Remera mu Mujyi wa Kigali.

Guhera mu 1995 rirakinwa, rikaba riteurwa n'Ishyirahamwe rya Volleyball mu Rwanda [FRVB] ku bufatanye na Komite Olempike y'u Rwanda [RNOSC] mu rwego rwo guha icyubahiro Abatutsi bishwe muri Jenoside yakorewe Abatutsi mu 1994, by'umwihariko ababarizwaga mu muryango wa Volleyball mu Rwanda.

Amakipe yo mu Rwanda azitabira iri Rushanwa mu kiciro cy'abagore agizwe na: