Ikipe y’Igihugu ya Beach Volleyball yerekeje muri Maroke gukina Shampiyona ny’Afurika

Ku Mugoroba wo kuri Iki Cyumweru tariki ya 23 Kamena [6] 2025, Ikipe y’Igihugu y'u Rwanda ya Volleyball ikinirwa ku Mucanga mu bagabo n’abagore, yerekeje mu gihugu cya Maroke muri Shampiyona ny’Afurika.

Iyi Kipe igizwe na “Mukandayisenga Benitha ufatanya na Munezero Valentine” mu kiciro cy’abagore na “Kanamugire Prince ufatanya na Niyonkuru Gloire” mu kiciro cy’abagabo.

Izatozwa na Mudahinyuka Christophe, mu gihe Uwimana Gisele azaba ashinzwe Ubuzima “Muganga”

Iyi mikino yo mu kiciro cy'abakinnyi bakuru, iteganyijwe kubera i Martil ku Nkombe z'Inyanja ya Mediterane hagati ya tariki ya 23-30 Kamena [6] 2025.

Amakipe azitwara neza muri iyi mikino, azakatisha itike yo guhagararira Umugabane w'Afurika muri Shampiyona y'Isi iteganyijwe mu Kwezi k'Ugushyingo [11] muri uyu Mwaka [2025].

Amakipe 88 yo mu kiciro cy'abagore bavuye mu bihugu 22 byo muri Afurika, ategerejwe muri iyi mikino.

Mu kiciro cy'abagabo, iyi mikino izitabirwa n'amakipe 114 avuye mu bihugu 27 byo ku Mugabane w'Afurika.