Ibihugu 12 bitegerejwe i Kigali mu Irushanwa rya ‘Billie Jean King Cup’

Ibihugu 12 byo ku Mugabane w'Afurika birimo n'u Rwanda, bitegerejwe i Kigali hagati ya tariki ya 14-19 Nyakanga [7] 2025 mu Irushanwa rya Billie Jean King Cup.

Ibihugu bizitabira iyi mikino, n'ibibarizwa mu Itsinda rya kane [Group IV].

Iri rushanwa mpuzamahanga ryo mu kiciro cy'abagore, rizakinirwa ku Bibuga bya IPRC-Kigali Tennis Ecology.

Umwaka ushize ubwo iri rushanwa riheruka gukinwa, u Rwanda rwasoreje ku mwanya wa gatanu [5], mu gihe Algeria ariyo yaryegukanye, ihita inakatisha itike yo kujya mu kindi kiciro, aho kuri ubu ibarizwa mu Itsinda rya gatatu [Group III].

Ibihugu bitegerejwe i Kigali bigizwe n'u Rwanda ruzakira iri rushanwa, Benin, Cameroon, Congo Brazzaville, Ethiopia, Lesotho, Mozambique, Senegal, Chad, Sudan, Togo na Tanzania.

Mbere y'uko amakipe atangira kwesurana, hateganyijwe tombora izabera i Kigali, aho aya makipe uko ari 12 azagabanywa mu matsinda 2, buri tsinda rikazashyirwamo amakipe 6.

Buri Kipe y'Igihugu izitabira iyi mikino, izaba igizwe n'abakinnyi bane [4].

Ku munsi w'umukino, buri gihugu kizajya gikina n'ikindi imikino itatu.

Bivuze ko buri bakinnyi babiri [2] bazajya bakina umukino hagati yabo, basoze bakina umukino nk'Ikipe, ibizwi nka [Doubles].

Buri ntsinzi izajya ibarirwa inota rimwe [1], mu gihe Ikipe izajya itsinda imikino 2 muri 3 yakinwe, azajya ihita yegukana intsinzi y'uwo munsi.

Iri rushanwa rihuza amakipe y'Igihugu y'abagore, ubusanzwe ryitwaga Fed Cup, nyuma riza guhindurirwa izina ryitwa Billie Jean King Cup.

Rikinwa hashingiwe ku manota Ibihugu bifite ku rutonde rw'Impuzamashyirahamwe y'Umukino wa Tennis ku Isi, ITF.

Ni ku nshuro ya gatatu yikurikiranya u Rwanda rwakira iyi mikino.

Rutangira gukina iyi mikino, u Rwanda rwayikinnye mu 2021 ubwo yakinirwaga i Vilnius ku murwa mukuru w'Igihugu cya Lithuania.