APR yatsinze REG yegukana Igikombe cya 16 cya Shampiyona n'icya 3 yikurikiranya

Ikipe y'Ingabo z'u Rwanda mu mukino wa Basketball, APR BBC, yaraye yegukanye Igikombe cya Shampiyona y'ikiciro cya mberee nyuma yo gutsinda iy'Ikigo cy'Igihugu cy'Ingufu, REG BBC.

Iki gikombe, cyari giherekejwe n'Imidali ya Zahabau na Miliyoni 15 z'Amafaranga y'u Rwanda.

Uyu mukino waraye uhuje amakipe yombi, wari uwa gatanu mu mikino ya nyuma ya kamarampaka.

APR BBC yawutsinze ku manota 81 kuri 72 ya REG BBC, ihita yegukanye Igikombe cya Shampiyona, cyane ko yari imaze kugira intsinzi 4 kuri 1, mu gihe haro hasigaye gukinwa imikino 2.

Bivuze ko niyo yari kuzayitsindwa, ntacyo byari kuzahindura, kuko REG BBC yari kugira 3 kuri 4.

Kwegukana iki gikombe, byari bivuze ko ari icya 16 muri rusange kuva yashingwa mu 1993, n'icya 3 yikurikiranya.

APR BBC yatwaye Igikombe cya Shampiyona hagati ya: 1995, 1996, 1997, 1998, 1999, 2000, 2001, 2002, 2003, 2005, 2006, 2008 and 2009 and 2023, 2024 na 2025.

Nyuma yo gushingirwa ku Mulindi wa Byumba mu gihe cy'Urugamba wa rwo kubuhora Igihugu, APR BBC yatangiye gukina Shampiyona y'u Rwanda mu 1995.

Kwegukana iki gikombe, byahise biyihesha kuzahagararira u Rwanda mu mikino ya Basketball Africa League [BAL], izakinwa Umwaka utaha w'i 2026.

Muri uyu mukino yatwariyeho Igikombe wakiniwe mu Nzu y'Imikino ya Kigali izwi nka BK Arena, agace ka mbere kawo, karangiye APR BBC iyakoboye n'amanota 17 kuri 15 ya REG BBC.

Nyuma yo gutsindwa agace ka mbere, REG BBC yikubise agashyi, yegukana aka kabiri itsinze amanota 20 kuri 18.

Amakipe yombi yahise ajya mu karuhuko k'iminota 15 anganya amanota 35-35.

Agace ka gatatu kakinwe nyuma yo kuva kuruhuka no kumva inama z'Abatoza, kegukanywe na APR BBC igatsinzemo amanota 21 kuri 19 ya REG BBC.

Nyuma yo kwegukana agace ka gatatu ntabwo byari bihagije kuri APR BBC, kuko yakageretseho n'aka kane, igatsinze mu manota 25 kuri 18, ihita yegukana Igikombe.

Muri uyu mukino, Umunyasenegal, Youssou Ndoye ukinira APR BBC niwe wawutsinzemo menshi [26], awutangamo Rebounds [7], anambura mukeba imipira [3].

Uretse Ndoye, Antino Jackson na Adonis Filer bari mu bafashije APR BBC kwitwara neza, nyuma yo gutsinda amanota 20 kuri Antino n'amanota 09 yatsinzwe na Adonis.

Ukwitwara neza kwa Youssou Ndoye, kwamuhesheje kuba umukinnyi wahize abandi muri iyi mikino [MVP].

Youssou Ndoye yasinyije APR BBC mu Kwezi kwa Mata [4], ubwo iyi kipe yiteguraga imikino ya nyuma ya Basketball Africa League [BAL], yakiniwe i Kigali no muri Afurika y'Epfo.

Yafashije APR BBC kwegukana umwanya wa 3 muri BAL, anagira uruhare mu mikino ya kimwe cya kabiri cya Shampiyona yabahuje na Patriots BBC, ndetse na Finale batsinzemo REG BBC.

Amakipe yegukanye Igikombe cya Shampiyona guhera mu 2009:

2025: APR

2024: APR

2023: APR

2022: REG

2021: REG

2020: Patriots

2019: Patriots

2018: Patriots

2017: REG

2016: Patriots

2015: Espoir

2014: Espoir

2013: Espoir

2012: Espoir

2011: Kigali Basketball Club [KBC]

2010: Kigali Basketball Club [KBC]

2009: APR.

Amafoto