Cricket: Tanzaniya yatsinze Zimbabwe yegukana Irushanwa ryo Kwibuka (Amafoto)

Ikipe y'Igihugu y'abagore ya Tanzaniya, yegukanye Irushanwa ryo kwibuka ku nshuro ya 31 Jenoside yakorewe Abatutsi mu Rwanda mu 1994, itsinze iya Zimbabwe ku mukino wa nyuma wakinwe kuri uyu wa Gatandatu tariki ya 14 Kamena [6] 2025.

Uyu mukino wakiniwe ku kibuga mpuzamahanga cya Cricket i Gahanga mu Karere ka Kicukiro mu Mujyi wa Kigali, warangiye Tanzaniya iwutsinze ku kinyuranyo cy'amanota 32.

Iri rushanwa ryakinwa ku nshuro ya 11, ryari ryitabiriwe n'Ibihugu 9 birimo n'u Rwanda.

Ibi buhugu byari bigizwe n'u Rwanda, Tanzania, Zimbabwe, Uganda, Nijeriya, Malawi, Brazil, Sierra Leone na Kameroni.

Muri uyu mukino wahuje Tanzaniya na Zimbabwe, Tanzaniya yatsinze tombola [Toss], itangira ishaka amanota, mu gihe Zimbabwe yayibuzaga kuyakora.

Igice cya mbere cy'uyu mukino [First Inning], cyarangiye Tanzaniya igitsinzemo amanota 99 mu gihe Zimbabwe yari yakuye mu kibuga abakinnyi bayo batandatu [Wickets 6].

Nyuma yo gusoza igice cya mbere ikoze ibyafatwaga nko kwihagararaho, abakunzi b'umukino wa Cricket bari i Gahanga, barimo Umuyobozi wa Komite Olempike y'u Rwanda, Umulinga Alice, Umuyobozi w'Ishyirahamwe ry'umukino wa Cricket mu Rwanda, Musaale Stephen, Murema Jean Baptiste uri muri komite ushizwe gutegura imikino yo kwibuka n'abandi... bari biteze kubona Zimbabwe ikora mu jisho Tanzaniya.

Gusa, ibi ntabwo ariko byagenze, kuko amanota 100 yasabwaga ngo yegukane intsinzi, ntabwo yashoboye kuyagezaho, kuko Tanzaniya yayibereye ibamba.

Kuri Ova [Over] ya 19 n'Udupira 3, Tanzaniya yari imaze gukura mu kibuga abakinnyi bose ba Zimbabwe [All out], mu gihe bari bamaze gutsinda amanota 67 gusa.

Mbere y'uyu mukino wa nyuma, u Rwanda na Uganda bari babanje kwesurana mu mukino wo guhatanira umwanya wa gatatu.

Uyu mukino warangiye wegukanywe n'Ikipe y'Igihugu ya Uganda, itsinze iy'u Rwanda ku kinyuranyo cy'amanota 20.

Muri uyu mukino, Uganda niyo yatangiye ikora amanota, bityo muri Ova [Overs] 20 yakinnye, izitsindamo 107, u Rwanda rukura mu kibuga abakinnyi bayo 5 gusa.

Mu gice cya kabiri cy'umukino, u Rwanda rwaje mu kibuga rushaka kwishyura aya manota yari yatsinzwe na Uganda, cyane ko rwakiniraga imbere y'abafana, ibi bikaba byari kimwe mu birungo byari kuruhesha intsinzi.

Gusa, bitandukanye n'ibyo abafana batekerezaga, Uganda yaje kubera intambamyi Ikipe y'Igihugu y'u Rwanda, umukino urangira u Rwanda rutsinze amanota 87, mu gihe Uganda yari yakuye mu kibuga abakinnyi 7.

Nyuma yo gusoreza ku mwanya wa kane mu gihe intego yari ugutwara Igikombe, kapiteni w'Ikipe y'Igihugu y'u Rwanda, Bimenyimana Diane, yiseguye ku bafana, avuga ko igikombe bagitakarije ku mikino ibiri ya nyuma bakinnye mbere yo guhatanira umwanya wa gatatu.

Bimenyimana yunzemo ko iri rushanwa ryari rikomeye ugereranyije n'ayaribanjirijwe, bityo ko ubunararibonye barikuyemo buzabafasha kwitegura neza andi ari marushanwa ari imbere, haba mu Rwanda no ku rwego mpuzamahanga.

Imwe mu mikino itegereje Ikipe y'Igihugu, irimo iyo guhatanira itike y'Igikombe cy'Isi cya Cricket giteganyijwe hagati ya tariki ya 12 Kamena [6] kugeza ku ya 05 Nyakanga [7] mu Mwaka utaha w'i 2026.

Akomoza ku musaruro w'iri rushanwa, Umuyobozi w'Isyirahamwe ry'umukino wa Cricket mu Rwanda, Musaale Stephen, yavuze ko umubare w'Ibihugu byaryitabiriye, ufite ubusobanuro rw'icyo iri rushanwa rivuze.

Yavuze ko ryatangiye mu 2014 rikinwa n'Ibihugu bibiri gusa [U Rwanda na Uganda], nyuma riza kwaguka, aho kuri ubu n'amakipe yo ku Mugabane w'Amerika y'Amajyepfo asigaye aryitabira.

Yasoje avuga ko intego ari ugukomeza kongera umubare w'abaryitabira, cyane ko mu Mwaka utaha ubwo rizaba rikinwa ku nshuro ya 12, hitezwe amakipe y'Ibihugu abarirwa muri 14.

Mu butumwa yageye abitabiriye uyu mukino n'abasiporotifu muri rusange, Umuyobozi wa Komite Olempike y'u Rwanda, Umulinga Alice, yakomoje ku itandukaniro ry'iri rushanwa n'andi asanzwe.

Yavuze ko ritegurwa hagamijwe kwibuka Abatutsi bishwe muri Jenoside yakorewe Abatutsi mu Rwanda 1994, no kubaha Icyubahiro gikwiriye Ikiremwamuntu, cyane ko ababishe babashinyaguriye.

Umulinga yaboneyeho gusaba Ibihugu byitabiriye iri rushanwa, kuba Abambasaderi b'u Rwanda mu guhangana n'abakana ndetse n'abapfobya Jenoside yakorewe Abatutsi, no guharanira ko bitazongera ukundi.

Uretse Ibikombe byatanzwe, abakinnyi bitwaye neza ku giti cyabo bashimiwe.

Umunyarwandakazi, Ishimwe Henriette yahembwe nk'umukinnyi wahize abandi [MVP].

Uretse kuba uwahize abandi, Ishimwe yanahembwe nk'uwarushije abandi kujugunya Udupira [Best Bowler].

Neema Justin Pius wa Tanzaniya, yahembwe nk'uwahize abandi mu gukora amanota menshi [Best Batter], mu gihe Rita Musamali wa Uganda, yahembwe nk'uwahize abandi nka Best Fielder.

Amafoto

Umulinga Alice na Musaale Stephen, bambitse Imidali Ikipe y'Igihugu ya Tanzaniya