Amakipe 13 ategerejwe muri Shampiyona y'Igihugu y'Imikino Ngororamubiri

Mu mpera z'iki Cyumweru, Ishyirahamwe ry'Imikino Ngororamubiri mu Rwanda, RAF, ryateguye Shampiyona y'Igihugu.

Iyi Shampiyona iteganyijwe kuri uyu wa Gatandatu tariki ya 19 Nyakanga [7] 2025, ikazakinirwa kuri Sitade Amahoro i Remera, mu Mujyi wa Kigali.

Biteganyijwe ko izitabirwa n'amakipe 13 y'abagabo n'abagore, azaba avuye mu gihugu hose, akazarushanwa mu byiciro 54 bitandukanye.

Aya makipe 13, azaba ahagarariwe n'abakinnyi barenga 700, nk'uko imibare y'Ishyirahamwe ry'Imikino Ngororamubiri mu Rwanda ibigaragaza.

Iyi Shampiyona ije ukurikira Irushanwa mpuzamahanga ryo gusiganwa mu maguru rizwi nka 'Kigali International Peace Marathon' ryakinwe mu ntangiriro z'Ukwezi gushize kwa Kamena [6].

Sitade Amahoro yaherukaga gukinirwamo mu Kwezi kwa Mata [4] 2025, ubwo hakinwaga Irushanwa ryo kwibuka ku nshuro ya 31 Jenoside yakorewe Abatutsi mu Rwanda mu 1994.

Iri rushanwa ryegukanywe n'Ikipe ya APR AC mu bagabo n'Ikipe ya Sina Gérard AC mu kiciro cy'abagore.

Amakipe 13 azitabira iyi Shampiyona akaba agizwe na: APR AC, Police AC, UR-Huye Campus AC, Sina Gérard AC, Nyamasheke District AC, Rutsiro District AC, Nyaruguru District AC, Rwamagana AC, Vision Jeunesse Nouvelle AC, EP Kinyina AC, Kavumu AC, Ngororero AC n'Ikipe ya Porogaramu y'Isonga izwi nka [Excellence centers of ISONGA Program].

Imikino nk'iyi yaherukaga gukinwa mu Kwezi kwa Gashyantare [2] 2025, icyo gihe ikaba yaregukanywe n'Ikipe ya Sina Gérard AC yo mu Karere ka Rulindo mu Ntara y'Amajyaruguru, iyi ikaba itozwa na Kanyabugoyi Anicet.