Umunyarwandakazi yakoze amateka muri Shampiyona y'Ubwongereza

Gisele Ishimwe, umwe mu bakinnyi b'Abanyarwandakazi bakina Umukino wa Cricket, yakoze amateka muri uyu mukino mu gihugu cy'Ubwongereza, aho ari gukina kuri ubu nk'umunyamwuga.

Yabaye Umukinnyi wa Cricket w'Umunyarwandakazi ukinne kuri uru rwego, ubwo yagaragaraga mu mukino Ikipe ya Odiham & Greywell Cricket Club yakinnye muri Shampiyona izwi nka Hampshire Women’s Cricket League.

Uyu mukinnyi w'Imyaka 20 kuri ubu, yatangiye gukina Umukino wa Cricket ku myaka 8 gusa y'amavuko, byari ikimenyetso simusiga kimugaragaza nk'uazavamo umwe mu bakinnyi bakomeye u Rwanda rwagize.

Nyuma y'Imyaka 9 atangiye gukina uyu mukino, yahise agirwa Kapiteni w'Ikipe y'igihugu y'abatarengeje Imyaka 19.

Nk'umwe mu bakinnyi iyi Kipe yagenderagaho, yayifashije kwitabira ku nshuro ya mbere imikino ya nyuma y'Igikombe cy'Isi cy'abatarengeje iyi Myaka [ICC U19 Women’s T20 World Cup], yabereye muri Afurika y'Epfo mu 2023. 

Ishimwe yerekeje mu Ikipe ya Odiham & Greywell Cricket Club mu Kwezi kwa Gicurasi [5] uyu Mwaka, mu rwego rwo gukarishya ubuhanga bwe muri uyu mukino, ukomeje gukura uko bwije n'uko bukeye imbere mu gihugu.

Umukino we wa mbere yakinnye akiyigeramo, yakoze amanota 111 mu Dupira 79, anakura mu kibuga abakinnyi 6.

Ibi yabikoze mu mukino wahuje Odiham & Greywell Cricket Club na Ropley Cricket Club.

Uyu musaruro wafashije Odiham & Greywell Cricket Club gutsinda amanota 315 muri Ova [Overs] 40.

Akomoza ku byiyumvo afite nyuma yo kwandika aya mateka, Gisele Ishimwe yagize ati:“Nk'umukinnyi mushya mu Ikipe, nkihagera nari mfite igihunga kivanze n'ubwoba. Gusa, nyuma yo gukina umukino wa mbere, ibintu byarahindutse. Buri uko bwije n'uko bukeye, ndushaho kuryoherwa n'ubuzima muri iyi kipe, bitandukanye n'uko byari bimeze ubwo nayizagamo”.

Yakomeje agira ati:“Kuba ari njye Munyarwandakazi rukumbi uri hano, bintera imbaraga zo gukora cyane, kugira ngo babone ko n'abandi bakinnyi babonye aya mahirwe babishobora. Birumvikana binshyiraho igitutu, ariko nkora uko nshoboye ngo nitware neza”.

“Aha mu Bwongereza, imikino iba ikomeye bitandukanye n'uko dukina mu Rwanda, cyane ko mpura n'abakinnyi twari duhanganye ubwo twakinaga imikino y'Igikombe cy'Isi cy'abatarengeje Imyaka 20. Uko mpura nabo kenshi, nabonye ari abakinnyi nk'abandi, kandi nkoze cyane ntacyo bandusha. Ibi bimfasha kwiga buri munsi kandi ndahamya ko nzabungukiraho byinshi”.

Kugeza ubu, Ikipe ya Odiham, Gisele Ishimwe akinira, iri mu zihabwa amahirwe yo kwegukana Igikombe, cyane ko iri ku mwanya wa mbere, ndetse ikaba imaze gutsinda imikino ine [4] yose imaze gukina.

Nyuma yo kwegukana Igikombe ntagihindutse, Gisele Ishimwe azagaruka i Kigali kwitabira umwiherero w'Ikipe y'Igihugu y'abatarengeje Imyaka 20, izaba yitegura amajonjora y'Igikombe cy'Isi cyo mu 2026 [ICC Women’s T20 World Cup], ku rwego rw'Afurika.

Iyi mikino y'amajonjora iteganyijwe kubera muri Botswana mu Kwezi gutaha kwa Nyakanga [7] 2025.

Amafoto

Gisele Ishimwe

Gisele Ishimwe