Zoe Bäckstedt na Jakob Soderqvist bahize abatarengeje Imyaka 23 muri Shampiyona y’Isi y’Amagare

Kuri uyu wa Mbere tariki ya 22 Nzeri [9] 2025, wari Umunsi wa kabiri wa Shampiyona y'Isi iri gukinirwa i Kigali mu Rwanda.

Nyuma y'uko ku Cyumweru tariki ya 21 Nzeri [9] 2025, hakinnye abakinnyi b'abagore n'abagabo bakuru mu gusiganwa n'igihe [IIT], kuri uyu wa Mbere hari hatahiwe abatarengeje Imyaka 23.

Umwongerezakazi Zoe Bäckstedt n'Umunyasuwede Jakob Soderqvist, begukanye Shampiyona y'Isi mu kiciro cy'abakinnyi b'abagore n'abagabo batarengeje Imyaka 23 bahiga abandi mu gusiganwa n'igihe, ibizwi nka Individual Time Trial [ITT].

Muri iki kiciro, Abanyarwandakazi “Ntakirutimana Martha na Nyirarukundo Claudette” bagihatanyemo, basoreje ku mwanya wa 27 n'uwa 32.

Umwongerezakazi Zoe Bäckstedt yahize abandi akoresheje 30’56’16’’’ ku Ntera ya Kilometero 22 na Metero 600, mu gihe Jakob Soderqvist yakoresheje 38’24’’43’’’ ku ntera ka Kilometero 31 na Metero 200.

Muri iki kiciro, Abanyarwanda “Niyonkuru Samuel na Tuyizere Etienne”, basoreje ku mwanya wa 28 n'uwa 30, bakoresheje 43’15’’35’’’ na 43’36’’51’’’.

Umwanya wa kabiri mu bagore wegukanwe n'Umunya-Silovakia, Viktoria Chladoñova wakoresheje 32:47.01, mu gihe Umutaliyanikazi, VENTURELLI Federica yabaye uwa gatatu akoresheje 33:07.74.

Mu kiciro cy'abagabo, umwanya wa kabiri wegukanwe n'Umunya-New Zealand, PRINGLE Nate akoresheje 39:28.39, mu gihe Umufaransa DECOMBLE Maxime yabaye uwa gatatu akoresheje 39:28.56.

Kuri uyu wa Kabiri tariki ya 23 Nzeri [9] 2025, biteganyijwe ko hazahatana abatarengeje Imyaka 18 mu Bangavu n'Ingimbi.

Muri iki kiciro, u Rwanda ruzaba ruhagarariwe n'abakinnyi 4, barimo 2 b'abakobwa na 2 b'abahungu.

Mu kiciro cy'Abangavu, u Rwanda ruzaba ruhagarariwe na Masengesho Yvonne na Uwiringiyimana Liliane, mu gihe mu Ngimbi ari Byusa Pacifique na Ishimwe Brian.

Abakinnyi bazahaguruka kuri BK Arena ahari gutengiririra iyi Shampiyona, basoreje kuri KKC.

Abangavu bazasiganwa Intera ya Kilometero 18 na Mtero 300, Ingimbi zirushanwe Kilometero 22 na Mtero 600.

Iyi Shampiyona iri gukinirwa i Kigali mu Rwanda, niyo ya mbere ikiniwe ku Mugabane w'Afurika, n'iya 13 hanze y'Umugabane w'i Burayi. N'iya 98 mu kiciro cy'abagabo n'iya 78 mu kiciro cy'abagore.

Izasozwa ku Cyumweru tariki ya 28 Nzeri (9) 2025, abakinnyi bahatana mu Muhanda (Road Race), ku ntera ya Kilometero zisaga 260.

Amafoto