Henrique Ribeiro yegukanye Etape ya 7 ya Tour du Rwanda 2026 (Amafoto)

Umunya—Brazil “Ribeiro Bravo Henrique” ukinira Ikipe ya Soudal Quick Step Development yo mu Bubiligi, yegukanye Etape ya 7 yahagurutse i Musanze yerekeza i Kigali ku ntera ya 147,2km.

Ni Etape yahagurutse imbere y’isoko ry’Akarere ka Musanze rizwi nka GOICO, yerekeza mu Mujyi wa Kigali inyuze mu Karere ka Gicumbi.

Henrique w’imyaka 19 gusa y’amavuko, yegukanye iri Etape akoresheje amasaha 3, iminota 20 n’amasegonda 29.

Yakurikiwe na VAN GILS Lucas ukinira Ikipe ya LOTTO - GROUPE WANTY, wakoresheje amasaha 3, iminota 21 n’amasegonda 8.

Umwanya wa gatatu wegukanywe n’Umunya-Eritereya MULUEBERHAN Henok nawe wakoresheje amasaha 3, iminota 21 n’amasegonda 8.

KRETSCHY Moritz wambaye Umwenda w’Umuhondo, yasoreje ku mwanya wa 5 akoresheje nawe akoresheje amasaha 3, iminota 21 n’amasegonda 8.

Ku ruhande rw’abakinnyi b’Abanyarwanda, MASENGESHO Vainqueur ukinira BENEDICTION BANAFRICA TEAM niwe witwaye neza, asoreza ku mwanya a 16 akoresheje amasaha 3, iminota 21 n’amasegonda 29.

Yari ifite udusozi 2 dukomeye turimo Umusozi wa Tetero ndetse n’Amapave yo kwa Mutwe i Nyamirambo, atisukirwa n’ubonetse wese.

Ku rutonde rusange, KRETSCHY amaze gukoresha amasaha 21, iminota 9 n’amasegonda 8.

Akurikiwe ADAMIETZ Johannes ukinira REMBE | RAD-NET, umaze gukoresha amasaha 21, iminota 11 n’amasegonda 16.

Mu gihe MARIVOET SCHOLIERS Duarte ukinira LOTTO - GROUPE WANTY ari ku mwanya wa gatatu, nyuma yo gukoresha amasaha 21, iminota 9 n’amasegonda 40.

NIYONKURU Samuel ukinira TEAM AMANI niwe Munyarwanda ufite umwanya mwiza ku rutonde rusange.

Samuel ari ku mwanya wa 17, nyuma yo gukoresha amasaha 21, iminota 14 n’amasegonda 59.

Kuri iki Cyumweru, nibwo hasorwa iri siganwa rya mbere muri Afurika ryari rimaze iminsi 8 rizenguruka u Rwanda. Abakinnyi bazarushanwa ku ntera ya 83,8 km.

Ntagihindutse, KRETSCHY Moritz ukomoka mu gihugu cy’u Budage ukinira Ikipe ya NSN yo muri Israel niwe uzegukana iri siganwa, nyuma yo kwambara Umwenda w’Umuhondo kuri Etape ya 5.

Amafoto