Rwandan Epic 2025: Kiptala, Lukas Baum begukanye Etape ya 4 yakiniwe mu Kinigi

Isiganwa ry’umukino w’Amagare rikinirwa mu Misozi rizwi nka Rwandan Epic riri gukinwa ku nshuro yaryo ya gatanu, riri kugera ku musozo.

Kuri uyu wa Kane, hakinwe Etape ya 4 ari nayo ibanziriza iza nyuma izakinwa ku munsi w’ejo.

Iyi Etape yakiniwe mu Kinigi mu Karere ka Musanze, mu gace kaberamo umuhango wo Kwita Izina abana b’Ingagi.

Nk’uko bisanzwe, isanishwa n’iki gikorwa, ndetse yaniswe Etape yitiriwe Kwita Izina.

Ni Etape yareshyaga na Kilometero 29 na Metero 800, yakiniwe ku Butumburuke bwa Metero 514.

Yegukanywe n’Ikipe ya Amani yo mu gihugu cya Kenya, igizwe na Dan Kiptala (Kenya) ukina afatanyije na Lukas Baum (Ubudage).

Kiptala na Baum bayegukanye nyuma yo gukoresha 01:13:34, basize 04:51 Ikipe y’Abanyazambiya Levy Pyele na Ernest Mazabuka yabakurikiye.

Umwanya wa gatatu muri iki kiciro cy’Ikipe y’abakinnyi b’abagabo bakina bafatanyije, wegukanywe n’Ikipe igizwe n’Umunyarwanda Bukhari Banzi ukina afatanyije n’Umuholandi, Louis van Zeeland.

Bukhari na Zeeland bari babuze mu makipe atatu ya mbere kuri Etape ya 3, bayagarutsemo kuri iyi Etape ya 4, bakoresheje 01:21:04.

Nyuma yo kwegukana Etape ya kabiri n'iya gatatu, Ikipe y'Umudage, Daniel Gathof ukina afatanyije n’Umuholandi, Bart Classens, ntabwo yahiriwe uyu munsi, nyuma y'uko Igare rya Gathof ritamubaniye.

Mu kiciro cy’Ikipe y’abagore, cyegukanywe n’Ikipe ya BeMC – Ndabaga, igizwe n’Umunyarwandakazi Martha Ntakirutimana, ukina afatanyije n’Umuholandikazi, Elodie Kuijper bakoresheje 01:05:16.

Abanya-Afurika y’epfo, Bianca Haw na Wade Young, begukanye iyi Etape mu kiciro cy’Ikipe igizwe n’Umukinnyi w’Umugabo w’uw’Umugore, bakoresheje 59:20.

Bakurikiwe n’Abanya-Esipanye, Oscar Pujol na Mude Rodriguez bakoresheje 01:03:16, mu gihe umwanya wa gatatu wegukanywe n’Ikipe ya Roberto Barreros Huertos (Esipanye) na Danila Fumero (Ubutaliyani) bakoresheje 01:08:40.

Mu kiciro cy’abakina ku giti cyabo mu bagabo, iyi Etape yegukanywe n’Umunya-Noruvege, Olav Tu Husveg wakoresheje 01:01:23.

Yakurikiwe n’Umuholandi Martijn Bressers wakoresheje 01:19:42, mu gihe umwanya wa gatatu wegukanywe n’Umunya-Esipanye Albino Olivares Iglesias.

Kuri uyu wa Gatanu tariki ya 05 Ukuboza (12) 2025 nibwo hamenyekana uwegukana Rwandan Epic.

Etape ya nyuma yahawe izina rya Uburanga, irahaguruka i Nemba yerekeza i Shyorongi, ku ntera ya Kilometero 77 na Metero 300, ku Butumburuke buri ku Kilometero na Metero 392.

Amafoto

Ikipe ya Lukas na Kiptala

Martha Ntakirutimana na Elodie Kuijper

Bianca Haw na Wade Young.