Amagare: Ikipe ya Bukhari na Zeeland yegukanye Etape ya mbere ya Rwandan Epic 2025

Ikipe y'Umunyarwanda Bukhari Banzi ukina afatanyije n'Umuholandi Louis van Zeeland, begukanye Etape ya mbere ya Rwandan Epic 2025 yakiniwe ahazwi nka Fazenda, rwagati mu Musozi wa Kigali (Mont Kigali).

Iyi Etape yareshyaga na Kilometero 9, bayitwaye bakoresheje Iminota 26 n'Amasegonda 26.

Muri iki kiciro cy'Ikipe y'abakinnyi babiri b'abagabo bakina bafatanyije, umwanya wa kabiri wegukanwe n'Ikipe igizwe na Daniel Gathof (Ubudage) ukina afatanyije na Bart Classens (Ubuholandi). Bakoresheje Iminota 26 n'Amasegonda 46.

Umwanya wa gatatu wegukanywe n'Ikipe yari igizwe na Lukas Baum (Ubudage) wakinnye afatanyije n'Umunyakenya, Dan Kiptala. Basizwe amasegonda 3 gusa n'Ikipe yabaye iya kabiri.

Ku ruhande rw'Amakipe y'Abakinnyi b'Abanyarwanda, Ikipe yari igizwe na Kevin Nshutiraguma wakinnye afatanyije na Elize Niyonkuru, niyo yasoreje ku mwanya wa hafi (10), ikoresheje Iminota 32 n'Isegonda.

Muri iki kiciro, hasiganwe amakipe 33, yari agizwe n'Abakinnyi 66.

Uretse Amakipe y'abakina bafatanyije mu kiciro cy'abagabo, hasiganwe n'abakina umuntu ku giti cye.

Mu kiciro cy'abakina ku giti cyabo mu gabo, iyi Etape yegukanywe n'Umubiligi, Geert Knoops, wakoresheje Iminota 30, Amasegonda 11 n'iby'Ijana 73.

Umunyarwanda Jackson Nkurikiyinka, ntabwo yamugiye kure, kuko yegukanye umwanya wa gatatu asigwa Amasegonda 36 gusa, mu gihe umwanya wa kabiri wegukanywe n'Umunya-Noruvege, Thomas Nærland wasizwe Amasegonda 35. Iki kiciro, hasiganwe abakinnyi 12.

Mu kiciro cy'Ikipe y'Abakinnyi bo mu kiciro cy'abagore bakina bafatanyije, iyi Etape yegukanywe n'Ikipe ya (Team BeMC–Ndabaga) yari igizwe na Elodie Kuijper (Ubuholandi) wakinnye afatanyije n'Umunyarwandakazi, Martha Ntakirutimana. Bakoresheje Iminota 36 n'Amasegonda 3.

Abanyafurika y'Epfo Bianca Haw wakinnye afatanyije na Wade Young, begukanye iyi Etape mu kiciro cy'Ikipe y'umukinnyi w'umugore ukina afatanyije n'umugabo, nyuma yo gukoresha Iminota 32 n'Amasegonda 42.

Nyuma yo gusoza iyi Etape yakiniwe ku Butumburuke bwa Metero 259, kuri uyu wa Kabiri tariki ya 02 Ukuboza (12) 2025, harakinwa Etape ya kabiri, iza guhagurikira kuri Urwibutso Enterprise ahazwi nko kuri Nyirangarama mu Karere ka Rulindo, yerekeza i Musanze kuri ARCC (Africa Rising Cycling Center).

Iyi Etape yo kuri uyu wa Kabiri, izaba ireshya na Kilometero 76 na Metero 100, ikinirwe ku Butumburuke bwa Metero 1846.

Umwaka ushize ubwo iri siganwa ryakinwaga ku nshuro yaryo ya kane (4), ryegukanywe n'Ababiligi Axel Baumans na Pierre de Froidmont.

Amafoto