Tour du Rwanda 2026: Itamar Einhorn yegukanye Etape ya mbere yasorejwe mu kivunge (Amafoto)

Umukinnyi mpuzamahanga w'Umunya-Israel ukinira Ikipe ya NSN Development, Itamar Einhorn, yegukanye Etape ya mbere ya Tour du Rwanda 2026 iri gukinwa ku nshuro ya 18.

Iyi Etape yareshyaga na ya 173,6km, yahagutse mu Rukomo ho mu Karere ka Gicumbi ku Isaha ya saa 11:00, yerekaza rwagati mu Mujyi wa Rwamagana.

Abakinnyi 84 bari mu makipe 18 arimo 3 yo mu Rwanda, nibo basiganwa kuri iki Cyumweru, ku ntera ndende kurusha izindi zose zizakinwa.

Muri aba bakinnyi 84, abakinnyo 51 ni inshuro ya mbere bakinnye iri siganwa ry'umukino w'amagare rifatwa nk'irya mbere ku mugabe wa Afurika.

Itamar w'Imyaka 28 y'amavuko, yakoresheje Amasaha 4, Iminota 5 n'Amasegonda 2.

Einhorn yakurikiwe n'Umunya-Esipanye, Hodei Muñoz Gabiña ukinira Ikipe ya  Soudal Quick-Step wasinzwe Amasegonda 13, mu gihe umwanya wa gatatu wegukanywe n'Umunya-Eritereya, Girmay Mewael ukinira Ikipe ya Istanbul yo muri Turukiya.

Ku ruhande rw'abakinnyi b'Abanyarwanda, n'ubwo adakinira Ikipe y'Igihugu cyangwa izindi ebyiri zibarizwa mu Rwanda ziri gukina iri siganwa, Muhoza Eric ukinira Ikipe ya Amani yo mu gihugu cya Kenya, niwe wasoreje ku mwanya mwiza (12), asigwa Umunota n'amasegonda 26 na  Einhorn.

Muri iyi Etape yo kuri iki Cyumweru, habayemo Impanuka yabereye mu Karere ka Gatsibo, yahitanye ubuzima bw'abantu 2 mu gihe 6 bakomeretse nk'uko ubuyobozi bw'Ishyirahamwe ry'umukino w'Amagare mu Rwanda (FERWACY), bwabyemeje.

Kuri uyu wa mbere, harakinwa Etape ya kabiri, iza guhaguruka mu Karere ka Bugesera yerekeza mu ka Huye, Etape izaba ireshya na 134,6 km.

Amafoto