Ingengo y'imari ya Tour du Rwanda 2026 yageze hafi kuri Miliyari 2 Frw

Mu gihe hasigaye Iminsi 4 gusa hagakinwa ku nshuro ya 18 Isiganwa ry'umukino w'Amagare rizenguruka u Rwanda rizwi nka Tour du Rwanda, ingengo y'imari yayo yiyongereyeho hafi 50% igera ku Mafaranga y'u Rwanda akabakaba Miliyari 2.

Ukwiyongera kw'iyi ngengo y'imari, kwahamijwe n'umuyobozi wungirije w'Ishyirahamwe ry'umukino w'Amagare mu Rwanda (FERWACY), Valentin Bigango.

Bigango yagize ati:“Ingengo y'imari y'uyu Mwaka w'i 2026 yiyongereyeho 50%”.

Aya makuru kandi yahamijwe na Hubert Nkurayija, umuyobozi ushinzwe gutegura iri siganwa rifatwa nk'irya mbere ku Mugabane wa Afurika.

Kuri iki Cyumweru tariki ya 22 Gashyantare (2) 2026, nibwo hazakinwa umunsi wa mbere (Etage/Stage), izahaguruka mu Karere ka Gicumbi yerekeza i Rwamagana, inyuze mu tundi turere turimo “Nyagatare, Gatsino na Kayonza”.

Gusa, muri aya makipe 18 ntiharimo Ikipe ya UAE yikuyemo ku munota wa nyuma.

Ku ruhande rw'amakipe yo mu Rwanda, uretse Ikipe y'Igihugu, iri siganwa kandi rizitabirwa n'Ikipe ya “Benediction Cycling Club ndetse na May Stars”.

Ku nshuro ya mbere mu mateka ya Tour du Rwanda, uduce 8 tuzakinwa, tuzerekanwa imbonankubone (Live), nk'uko byahamijwe na Bigango.

Akomoza ku kamaro ko kwerekeza iri siganwa imbonankubone, Bigango yavuze ko bizafasha Tour du Rwanda kugera ku bantu benshi ndetse n'Igihugu muri rusange kirusheho kumenyekana.

Mbere y'uko iri siganwa ritangira nyirizina, amwe mu Makipe yamaze kugera i Kigali.

Amwe mu yamaze kugera i Kigali, arimo Ikipe ya “Rembe Rat” yo mu gihugu cy'Ubudage.

Niyo Kipe ya mbere yo hanze y'u Rwanda yamaze kugera i Kigali, mu gihe izindi zitegerejwe guhera kuri uyu wa Kane.

Uduce 8 tuzakinwa muri iyi Tour du Rwanda igiye gukinwa ku nshuro ya 18 tugizwe na:

Agace ka 1: Rukomo – Rwamagana (174 km)

Agace ka 2: Nyamata – Huye (135 km)

Agace ka 3: Huye – Rusizi (145 km)

Agace ka 4: Karongi – Rubavu (127 km)

Agace ka 5: Rubavu Criterium (82 km)

Agace ka 6: Rubavu – Musanze (84 km)

Agace ka 7: Musanze – Kigali (147 km)

Agace ka 8: Kigali – Kigali (99 km).