Kabuhariwe 'Tadej Pogacar' ategerejwe i Kigali muri Shampiyona y'Isi

Rurangirwa mu mukino wo gusiganwa ku Magare, Tadej Pogacar, yatangaje ko azitabira Shampiyona y'Isi yo mu Muhanda, izabera i Kigali mu Rwanda, mu Kwezi kwa Nzeri [9] 2025.

Uyu Munya-Slovenia w'Imyaka 26 y'amavuko, niwe nimero ya mbere mu mukino w'amagare ku Isi kuri ubu.

Nyuma yo kwegukana Tour de France, Isiganwa rya mbere ku Isi mu mukino w'Amagare, Ikinyamakuru cy'Abongereza BBC dukesha iyi nkuru, cyanditse ko uyu mukino atazitabira Isiganwa rizenguruka Esipanye rizwi nka La Vuelta, mu rwego rwo kwitegura Shampiyona y'Isi izabera mu Rwanda.

Muri uku Kwezi kwa Nyakanga [7], Tadej Pogačar yegukanye Tour de France ku nshuro ya kane, bituma aba umukinnyi wanditse amateka adasanzwe muri iri siganwa rizenguruka Ubufaransa.

Tadej Pogačar azaza i Kigali nk'umukinnyi ubitse Umudali wa Zahabu wa Shampiyona y'Isi, Umudali yegukanye Umwaka ushize, muri Shampiyona yakiniwe i Zürich mu Busuwisi, hagati ya tariki ya 22 na 29 Nzeri [9] 2024.

Mbere yo kuza i Kigali, Ikipe ya UAE Team Emirates-XRG asanzwe akinira, izitabira Isiganwa ry'Umunsi umwe rizakinirwa mu Mijyi ya Quebec na Montreal mu gihugu cya Canada, hagati mu Kwezi kwa Nzeri [9].

Pogacar yavuze ko yishimiye kuba agiye kongera gutwarira Igare mu Mihanda ya Canada, kandi izakoresha iri siganwa nk'imyitozo yo gutegura Shampiyona y'Isi izabera i Kigali, hagati ya tariki ya 21 na 28 Nzeri [9] 2025.

Nk'umwe mu bakinnyi b'ibihangange mu gusiganwa ku Magare, isiganwa rizenguruka Igihugu cya Esipanye, La Vuelta, niryo Pogacar ataregukana.]

Mu 2019, yasoreje ku mwanya wa 3, ikaba ari nayo nshuro rukumbi yarikinnye.

Shampiyona y'Isi izabera mu Rwanda, ni ku nshuro ya mbere izaba ikiniwe ku Mugabane w'Afurika, ni n'inshuro ya mbere kandi Tadej Pogačar azaba akiniye muri Afurika.