Mouris Michiel na Arens Megan begukanye Shampiyona y'isi y'Amagare mu 'Ngimbi n'Abangavu'

Abaholandi Arens Megan na Mouris Michiel, begukanye Shampiyona y'Isi y'Umukino w'Amagare mu kiciro cy'Abangavu n'Ingimbi nyuma yo guhiga abandi mu gusiganwa n'igihe, ibizwi nka [Individual Time Trial] mu Ndimi z'Amahanga.

Mu kiciro cy'Abangavu, bakinnye Intera ingana na 18,3km, mu gihe mu cy'Ingimbi yari Intera ya 22,6 Km.

Mu Bangavu, Arens Megan yahize abandi akoresheje Iminota 25, Amasegonda 47 n'iby'Ijana 41.

Muri iki kiciro, Abanyarwandakazi “Yvonne Masengesho” na “Uwiringiyimana Liliane”, basoreje ku mwanya wa 33 n'uwa 40.

Mu Ngimbi, Mouris Michiel yakoresheje Iminota 29, Amasegonda 07 n'iby'Ijana 61.

Nk'uko byagenze mu kiciro cy'Abangavu, no mu cy'Ingimbi ntabwo Abanyarwanda borohewe, kuko Byusa Pacifique yasoreje ku mwanya wa 53, mu gihe Ishimwe Brian yabaye uwa 55.

Byusa yasizwe na Mouris Iminota 5, Amasegonda 27 n'iby'Ijana 36, mu gihe Ishimwe yasizwe Iminota 5, Amasegonda 52 n'iby'Ijana 16.

Mu kiciro cy'Ingimbi, Mouris yakurikiwe n'Umunyamerika, Barry Ashlin wasizwe Amasegonda 6 n'iby'Ijana 84, mu gihe umwanya wa gatatu wegukanywe n'Umubiligi, Van Kerckhove Seff warushijwe Amasegonda 8 n'iby'Ijana 58.

Mu kiciro cy'Abangavu, Megan yakurikiwe n'Umunya-Esipanyekazi, Ostiz Taco  Paula, wasizwe Amasegonda 35 n'iby'Ijana 30, mu gihe umwanya wa gatatu wegukanywe n'Umunya-Noruvegekazi, Gissinger Oda Aune, wasizwe Amasegonda 37 n'iby'Ijana 34.

Uyu munsi, Shampiyona y'Isi yari imaze igihe itangirira kuri BK Arena igasorezwa kuri KKC, izimuka kuri uyu wa Gatatu, aho izajya itangirira kuri KKC ikaba ari naho isoreza.

Biteganyijwe ko kuri uyu wa 24 Nzeri [9] 2025, Shampiyona y'Isi y'Amagare iri gukinirwa mu Mujyi wa Kigali ku nshuro ya 98 n'iya 01 muri Afurika, irakinwa mu buryo bw'amakipe y'Ibihugu, abakinnyi basiganwa n'igihe [Team Time Trial].

Izanyura mu Mihanda ya KCC - Gishushu - Chez Lando - Prince House - Sonatube - Nyanza - Kugaruka Sonatube - Rwandex - Kanogo - Mediheal - Women Foundation Ministries [Kwa Mignone] - Ku Muvunyi - KCC - KCC - Gishushu - MTN  Mu kabuga ka Nyarutarama - Kuzenguruka Golf - SOS - MINAGRI - KABC - RIB - Mediheal - Women Foundation Ministries [Kwa Mignone] - Ku Muvunyi - KCC.

Mu gihe hashize iminsi 3 iyi Shampiyona ikinwa, biracyagoye ku bakinnyi b'Abanyarwanda, kuko kugeza ubu batarabasha kuza mu bakinnyi 10 ba mbere.

Amafoto