Amagare: Umunya – Slovenia 'Tadej Pogačar' yegukanye Shampiyona y’Isi (Amafoto) 

Umunya – Slovenia, Tadej Pogačar, yegukanye Shampiyona y’Isi y’umukino wo gusiganwa ku Magare akoreshwa mu Muhanda, mu kiciro cy’abagabo, ahize abandi ku Ntera ya 267,5 Km.

Uyu mugabo w’Imyaka 27 gusa y’amavuko, yegukanye iyi Shampiyona asize abakinnyi 165 bahagarariye Ibihugu 57.

Pogačar usanzwe ukinira Ikipe ya UAE Team Emirates XRG yo muri Leta zunze Ubumwe z'Abarabu, yegukanye iyi Shampiyona akoresheje Amasaha 6, Iminota 21 n'Amasegonda 20.

Ni ku nshuro ya kabiri yikurikiranya Pogačar yegukana iyi Shampiyona, nyuma y'uko yayegukanye Umwaka ushize, ubwo yakinirwaga i Zurich mu Busuwisi, akoresheje Amasaha 6, Iminota 27 n'Amasegonda 30.

Yakurikiwe n'Umubiligi, EVENEPOEL Remco, wasizwe Umunota n'Amasegonda 18, mu gihe umwanya wa gatatu wegukanywe Umunya – Ireland, Benjamin Maxton Healy wasinzwe Iminota 2 n'Amasegonda 16.

Ni Isiganwa ritari ryoroshye na gato, hashingiwe ku Nzira abakinnyi bakoresheje.

Nyuma yo guhaguruka kuri Kigali Convention Center [KCC] ku Isaha ya saa 09:45, abakinnyi banyuze, Nyarutarama → MINAGRI → Kimihurura → MediHeal → Ku Kabindi → KCC.

Uyu Muhanda bawunyuzemo inshuro 9, mu gihe inshuro 1 yareshyaga na 15km zirengaho gato.

Izi nshuro icyenda zirangiye, bakomereje, Kimihurura → Peyage → Rond Point yo mu Mujyi → Ku Muhima → Nyabugogo → Kuri Ruliba → Karama ka Norvège → Nyamirambo Tapis Rouge → Kimisagara → Kwa Mutwe → Mu Biryogo → Gitega → Rond Point yo mu Mujyi → Peyage → MediHeal → Ku Kabindi → KCC, bahanyure inshuro imwe.

Isiganwa ryasojwe bazenguruka inshuro esheshatu mu Muhand awa KCC → Nyarutarama → MINAGRI → Kimihurura → MediHeal → Ku Kabindi → KCC.

Ku ruhande rw’abakinnyi b’Abanyarwanda ntabwo borohewe, ndetse n’Abanyafurika muri rusange.

By’umwihariko, nta mukinnyi w’Umunyarwanda muri 6 basiganwe washoboye gusoza iyi Ntera.

Nsengiyumva Shemu niwe Munyarwanda wari wahanyanyaje, ariko aza kuva mu Isiganwa ubwo ryari rimaze kuva i Nyamirambo, ahazwi nko k’Umuhanda w’Amapave, kwa Mutwe, nyuma yo kunyura Nyabugogo. Yavuyemo Isiganwa rigarutse kuri KCC.

Ni mu gihe u Rwanda rwari ruhagarariwe na: MANIZABAYO Eric, MASENGESHO Vainqueur, BYUKUSENGE Patrick, MUHOZA Eric, NKUNDABERA Eric na NSENGIYUMVA Shemu.

Ku ruhande rw’abandi bakinnyi b’Ibihangange bari muri isi Siganwa, Umubiligi Remco Evenepoel ntabwo yaritwaye nk’uko yabyifuzaga, nyuma yo kugira ikibazo cy’Igare inshuro 2.

Inshuro ya nyuma Igare ryamupfiriye, yazamukaga ku Muhanda w’Amapave wa Kimihurura, ahazwi nko kwa Mignone.

Ryapfuye Isiganwa rigeze ku 75.6km, mu gihe yasigwaga na Tadej Pogačar, Amasegonda 46.

Ku ruhande rw'abakinnyi b'Abanyafurika, Umunya – Eritrea, Amanuel Ghebreigzabhier niwe warushije abandi kwitwara neza, asoreza ku mwanya wa 30, asigwa Iminota 12 n'Amasegonda 4.

Uko ibihugu byegukanye imidali. Habanza Umudali wa Zahabu [Gold], Hagakurikirwaho uwa Feza [Silver], hagasoza uw'Umuringa [Bronze].

1. U Buholandi (2, 1, 1)
2. U Bwongereza (2, -, -)
3. U Bufaransa (1, 2, 1)
4. U Busuwisi (1, 1, 2)
5. Espagne (1, 1, 2)
6. U Bubiligi (1, 1, 2)
7. U Butaliyani (1, 1, 1)
8. Australia (1, 1, -)
9. Canada (1, -, -)
10. Slovenia (1, -, -)
11. Suede (1, -, -)
12. Nouvelle-Zelande (-, 2, -)
13. Slovakia (-, 2, -)
14. Leta Zunze Ubumwe za Amerika (-, 1, -)
15. Irlande (-, -, 1)
16. Autriche (-, -, 1)
17. Pologne (-, -, 1)
18. Norvege (-, -, 1).

Uyu munsi wa nyuma wa Shampiyona y'Isi yari imaze Iminsi 8 ikinirwa mu Mujyi wa Kigali, witabiriwe na Perezida wa Repubulika y'u Rwanda, Paul Kagame, Igikomangoma Albert II wa Monaco na Perezida w’Impuzamashyirahamwe y’Umukino w’Amagare ku Isi [UCI], David Lappartient.

Amafoto: [UCI & IGIHE]

Tadej Pogacar

Remco Evenepoel

Ben Healy