Abakinnyi ba APR begukanye Shampiyona ya Volleyball ikinirwa ku Mucanga (Amafoto)

Abakinnyi b'Ikipe y'Ingabo z'u Rwanda, APR Volleyball Club, begukanye Agace ka gatatu ari nako kasoje Shampiyona ya Volleyball ikinirwa ku Mucanga mu mwaka w'i 2024-25.

Iyi shampiyona yasorejwe mu Karere ka Rubavu kuri iki Cyumweru, yakinwe mu gihe cy'Iminsi itatu, hagati ya tariki 13-15 Kamena [6] 2025.

Utundi duce tubiri twabanjirije aka kanyuma, twakiniwe kuri King Fisher Resort ku Rwesero mu Karere ka Gasabo.

Mu kiciro cy'abagore, Ikipe ya Munezero Valentine ufatanya na Mukandayisenga Benitha, yatsinze amaseti 2-0 iya Musabyimana Penelope ufanya na Amito Sharon. Aba bakinnyi bose bakinira ikipe ya APR.

Uretse mu kiciro cy'abagore, mu cy'abagabo, Ikipe ya Paul Akan ufatanya na Ibrahim, yatsinze amaseti 2-1, Ikipe ya Revis ufatanya na Mandela Nzirimo.

Paul Akan asanzwe ari Umupaseri [Setter] wa APR VC, mu gihe Ibrahim ari umukinnyi mushya APR VC yitabaje ngo azayifashe mu mikino y'Irushanwa ryo kwibuka ku nshuro ya 31 Jenoside yakorewe Abatutsi mu 1994. 

Ibrahim ukomoka muri Ghana, APR VC yamwiyambaje imukuye muri Shampiyona ya Tuniziya, ndetse akaba ari umukinnyi w'Ikipe y'Igihugu ya Ghana, asangiye na Paul Akan.

Iyi mikino iteganyijwe mu mpera z'iki Cyumweru, hagati ya tariki ya 20-22 Kamena [6] 2025.

Revis asanzwe ari Ribero w'Ikipe ya APR VC, mu gihe Nzirimo Mandela ari umukinnyi w'Ikipe ya Gisagara VC.

Muri iyi Shampiyona, umwanya wa gatatu mu kiciro cy'abagore wegukanywe n'Ikipe y'abakinnyi ba RRA VC, Ukpabi Elizabeth Ijoma ufatanya na Jenipher Tembo, batsinze bagenzi babo, Uwingabire Denyse ufatanya na Nzamukosha Oliva.

Ukpabi Elizabeth Ijoma akomoka muri Nijeriya, mu gihe Jenipher Tembo ari Umunyazimbabwe.

Mu kiciro cy'abagabo, umwanya wa gatatu wegukanywe n'Ikipe ya David Neeke na Bure Hassan bo mu gihugu cya Tanzaniya.

Agace kasoje iyi Shampiyona, kitabiriwe n'abakinnyi 58 bakomoka mu bihugu 8 bitandukanye byo ku Mugabane w'Afurika, birimo n'u Rwanda. Aba bakinnyi, bari bagabanyijemo amakipe 13 y'abagore na 16 y'abagabo.

Mu byiciro byombi, Ikipe ya mbere yahawe Umudali wa Zahabu, Igikombe n'Amafaranga Ibihumbi 400 by'u Rwanda.

Ikipe ya kabiri yahawe Umudali wa Silver, waherekejwe n'Amafaranga Ibihumbi 300 by'u Rwanda, mu gihe iya gatatu yahawe Umudali wa Bronze, waherekejwe n'Amafaranga Ibihumbi 200 by'u Rwanda.

Amafoto