Burera: Nyinawagaga Claudine yasabye ubuyobozi gufasha abaturage kwikura mu bukene

Umuyobozi mukuru w’Ikigo cy'Igihugu gishinzwe guteza imbere ibikorwa by'iterambere mu nzego z'ibanze (LODA), Nyinawagaga Claudine yasabye abayobozi bo mu Karere ka Burera, gukora ibishoboka byose bagakura abaturage mu bukene.

Yabigarutse kuri uyu wa 06 Ukuboza (12) 2025, mu kiganiro yagejeje ku bitabiriye umwiherero w'inzego z'ubuyobozi z'Akarere ka Burera.

Uyu mwiherero wateraniye mu Cyumba cy'inama cy'Akarere Ka Burera, hagati ya tariki ya 05-07 Ukuboza (12) 2025.

Wari ugamije “Gusuzumira hamwe ishusho rusange y'Akarere no gufata ingamba zikwiye ku cyerekezo cy'igihe kirekire”.

Muri uyu mwiherero, Bizimungu Jean Baptiste, umuyobozi w'inama njyana y'aka Karere, yibukije abawitabiriye ko ari umwanya mwiza wo gusubiza amaso inyuma bakarebera hamwe ibitaragezweho, impamvu bitagezweho no kurebera hamwe icyakorwa ngo hazibwe ibyuho bigaragara.

Mukamana Soline, umuyobozi w'aka Karere, yagejeje ku waitabiriye ishusho rusange y'Akarere, aboneraho kubasaba kwihutisha ishyirwa mu bikorwa ry'ibyo Akarere kiyemeje.

Yibanda ku byagaragajwe n'ubushakashatsi bwakozwe n'urwego rw'Igihugu ry'imiyoborere (RGB) mu 2025, Niyikora Sylvere, yaboneyeho gusaba abitabiriye uyu mwiherero, kurushaho gutanga umusaruro, kugira ngo mu Mwaka utaha, Akarere gahore ku isonga, nk'uko yakoboye utundi muri uyu Mwaka mu bushakashatsi bwa RGB bujyanye n'uko abaturage bafitiye ikizere abayobozi b'Uturere twabo.

Ashingiye ku ngendoshuri zakorewe mu Turere twa Huye na Rwamagana, Umunyamabanga Nshingwabikorwa w’Akarere, Karangwa James, yasangije abitabiriye uyu mwiherero ibijyanye na politiki yo kwegereza ubuyobozi n’ubushobozi abaturage.

Uyu mwiherero witabiriwe n'abagize inama njyanama y'Akarere, abagize inama y'umutekano itaguye y'Akarere, Umunyamabanga Nshingwabikorwa w'Akarere, Umuyobozi w'imirimo rusange mu Karere, Abanyamabanga nshingwabikorwa b'Imirenge, abahagarariye Abafatanyabikorwa b'Akarere n'abayobozi b'Amashami...

• Burera ihagaze ite mu bijyanye n'ubukene mu baturage?

Mbere ya 2024, raporo y’Akarere (2018–2024) yerekanaga ko 50.4% by’abaturage bari munsi y’umurongo w’ubukene, naho ~ 23% bari mu bukene bukabije.

Kugira ngo ubukene buhashywe, Akarere kiyemeje gushyigikira gahunda z’ubworozi n’ubuhinzi, guha amahirwe urubyiruko, kongera amahirwe y’imyuga n’ibikorwa byunguka.

Hari kandi gukomeza guteza imbere uburezi, ubumenyi, n’imyuga hagamije gufasha abaturage kugira ubushobozi bwo kwiteza imbere.

Akarere kandi kiyemeje gushyira imbaraga mu kurwanya igwingira n’imirire mibi, cyane ku bana n’abagore, no kunoza imibereho y’imiryango ikennye.

Amafoto