Ubufaransa bwatangaje Abakinnyi bazakina Shampiyona y'Isi y'Amagare izakinwa mu Rwanda

Ubufaransa bwatangaje abakinnyi 12 bazabuserukira muri Shampiyona y'Isi y'Umukino w'Amagare, iteganyijwe gukinirwa i Kigali mu Rwanda hagati ya tariki ya 21 na 28 z'Ukwezi kwa Nzeri [9] 2025.

Abakinnyi batangajwe n'abagize Ikipe y'Igihugu y'Ingimbi n'iy'abatarengeje Imyaka 23.

Abakinnyi batangajwe ntibarimo, Paul Seixas ufite Imyaka 18 gusa y'amavuko, nyuma y'amategeko mashya yatangajwe Umwaka ushize n'Impuzamashyirahamwe y'Umukino w'Amagare ku Isi, UCI.

Paul Seixas n'umwe mu bakinnyi Abafaransa bari bafitiye ikizere cyo kuzegukana Umudali mu batarengeje Imyaka 23.

Seixas yari yitezwe mu bakinnyi batarengeje Imyaka 23 no mu kiciro cyo gusiganwa n'Isaha [Individual Time Trial].

Amategeko mashya yagonze Seixas, avuga ko abakinnyi bakina mu makipe ya World-Tour [First Division] n'abakina mu ya Pro-Teams [Second Division], batemerewe gukina mu batarengeje Imyaka 23 muri Sampiyona y'Isi.

Abakinnyi bagize Ikipe y'Ingimbi n'iy'abatarengeje Imyaka 23

Abakinnyi b'Ikipe y'Igihugu y'Ingimbi bagizwe na: Johan Blanc [17, Groupama-FDJ Conti Juniors], Yann Dubois [17, Argenteuil Val de Seine Cyclisme Junior] na Théophile Vassal [17, Decathlon – AG2R La Mondiale].

Abatarengeje Imyaka 23 bagizwe na: Breton Pierre Henry Basset [21, XDS Astana Development Team], Maxime Decomble [20, Groupama-FDJ Continental] na Victor Loulergue [20, Bourg-en-Bresse Ain Cyclisme].

Abakinnyi bagize Ikipe y'Abangavu n'iy'abatarengeje Imyaka 23

Abakinnyi b'Ikipe y'Igihugu y'Abangavu bagizwe na: Maëva Plagniol, Thaïs Poirier na Lise Revol, mu gihe iy'abatarengeje Imyaka 23 igizwe na; Julie Bego [20, Cofidis Women Team], Marion Bunel [20, Visma-Lease a Bike Women Team] na Célia Géry [19, FDJ-Suez].

Bitandukanye no mu kiciro cy'abagabo, mu cy'abagore, abakinnyi bakina mu Makipe ya World-Tour, bemerewe gukina iyi Shampiyona.

Shampiyona y'Isi izabera i Kigali ifite umwihariko, cyane ko bizaba ari ku nshuro ya mbere ikiniwe muri Afurika no mu Rwanda muri rusange.

Bizaba ari no ku nshuro ya mbere kandi, abagore batarengeje Imyaka 23 bayikinnye.

Mu kiciro cy'abagore muri Shampiyona z'Imyaka ishize, hahembwaga umukinnyi wayikinaga atarengeje Imyaka 23 mu bagore wahize abandi.

Nyuma y'uko amategeko ahindutse, abagore bakuru bazajya bakina mu kiciro cyabo, n'abatarengeje Imyaka 23 barushanwe mu cyabo.

Byitezweko Ikipe y'Igihugu y'Ubufaransa izajya ihagararirwa n'abakinnyi 3 muri buri kiciro, ku mpamvu zavuzwe ko zifitanye isano n'ingendo z'Indege ziva i Burayi zerekeza muri Afurika.