U Rwanda rwatangiye irushanwa rya 'Tri-Nations Series' rutsindwa na Bahrain

Ikipe y'Igihugu y'u Rwanda y'abagabo y'umukino wa Cricket, ntiyahiriwe n'Umunsi wa mbere w'Irushanwa rya Tri-Nations Series, nyuma yo gutsindwa n'Ikipe y'Igihugu ya Bahrain ku kinyuranyo cya Wiketi 8 [Wickets 8].

Iri rushanwa ryitabiriwe n'Ibihugu bitatu birimo u Rwanda, Malawi na Bahrain, riri gukinirwa mu Karere ka Kicukiro mu Mujyi wa Kigali, kuri Sitade mpuzamahanga cy'Umukino wa Cricket i Gahanga. 

Uyu mukino wakinwe ku Isaha ya saa 13:45 za Kigali, watangiye Ikipe y'Igihugu ya Bahrain itsinda tombora [Toss], ihitamo gutangira ijugunya Udupira [Bowling], mu gihe u Rwanda rwadukubitaga [Batting]

Igice cya mbere cy'uyu mukino, cyarangiye u Rwanda rugitsinzemo amanota 102 muri Overs 19 n'Udupira 4, mu gihe Abakinnyi b'Ikipe y'Igihugu ya Bahrain bari bakuye mu Kibuga abakinnyi bose b'u Rwanda, ibizwi nka 'All Out' mu mukino wa Cricket.

Igice cya kabiri cyatangiye Ikipe y'Igihugu ya Bahrain ihabwa amahirwe yo kwishyura amanota 102 yari yatsinzwe n'u Rwanda, cyane ko umwanya wa 26 iriho k'urutonde rw'Impuzamashyirahamwe y'Umukino wa Cricket ku Isi, ICC, wari uhabanye cyane n'uwa 61 u Rwanda ruriho.

Ubu buhangange bw'Ikipe y'Igihugu ya Bahrain, bwayifashije kwegukana uyu mukino bitayigoye, kuko muri Overs 17 n'Udupira 2, yari imaze gutsinda amanota 105, mu gihe u Rwanda rwari rwakuye mu Kibuga abakinnyi bayo 2 gusa [Wickets 2].

Nyuma y'uyu mukino wakinwe kuri uyu wa Gatanu, kuri uyu wa Gatandatu tariki ya 19 Nyakanga [7] 2025, imikino ikazakomeza, Ikipe y'Igihugu ya Malawi yisobanura n'iya Bahrain ku Isaha ya 09:15, mu gihe kandi iyi Malawi izahita igaruka mu Kibuga ku Isaha ya saa 13:15 ikina n'Ikipe y'Igihugu y'u Rwanda.

Muri aya makipe y'Ibihugu yitabiriye iyi mikino uko ari 3, Ikipe y'Igihugu ya Bahrain iri ku mwanya wa 26 ku Isi, Malawi ikaba iri k'umwanya wa 52, mu gihe u Rwanda ruri k'umwanya wa 61.

Kuri iyi nshuro ya gatatu iri rushanwa rikinirwa mu Rwanda, aya makipe y'Ibihugu uko ari 3, buri yose izahura n'indi ibizwi nka [Round Robin Games], Ikipe izatsinda imikino myinshi, ihite yegukana Igikombe.

Mu kiganiro n'Itangazamakuru cyahuje ba Kapiteni n'Abatoza b'aya makipe yose, k'uruhande rw'u Rwanda, Clinton Rubagumya, Kapiteni w'Ikipe y'Igihugu y'u Rwanda, yavuze ko n'ubwo aribo bafatwa nk'Ikipe yoroshye muri aya yose, bazakora ibishoboka byose bagakora mu jisho ibi bigugu.

Iyi mikino yatangiye kuri uyu wa 18 Nyakanga [7] 2025, izasozwa ku wa Gatandatu w'Icyumweru gitaha, tariki ya 26 Nyakanga [7] 2025, mu gihe Amakipe azahaguruka i Kigali ku Cyumweru tariki ya 27 Nyakanga [7] 2025 asubira mu bihugu byabo.