U Rwanda ruzitabira Shampiyona ny’Afurika ya Beach Volleyball muri Maroke

Ikipe y'Igihugu y'u Rwanda ya Volleyball ikinirwa ku Mucanga, izitabira Shampiyona ny'Afurika izakinirwa muri Maroke.

Iyi mikino yo mu kiciro cy'abakinnyi bakuru, iteganyijwe kubera i Martil ku Nkombe z'Inyanja ya Mediterane hagati ya tariki ya 23-30 Kamena [6] 2025.

Uretse abakinnyi b'u Rwanda mu kiciro cy'abagabo n'abagore, amakipe 88 yo mu kiciro cy'abagore bavuye mu bihugu 22 byo muri Afurika, ategerejwe muri iyi mikino.

Mu kiciro cy'abagabo, iyi mikino izitabirwa n'amakipe 114 avuye mu bihugu 27 byo ku Mugabane w'Afurika.

Amakipe azitwara neza muri iyi mikino, azakatisha itike yo guhagararira Umugabane w'Afurika muri Shampiyona y'Isi iteganyijwe mu Kwezi k'Ugushyingo [11] muri uyu Mwaka [2025].

Mu gihe abakinnyi b'u Rwanda bategerejwe muri iyi mikino, ibindi bihugu birimo: Kenya, Egypt, Nigeria, Uganda, Senegal, DR Congo, South Africa, Botswana, Benin, Guinea-Bissau, Mauritius, Central African Republic, Mozambique, Niger, Cape Verde, Comoros, Sierra Leone, Togo na Morocco.

Mu gihe imikino ibura iminsi ibarirwa ku ntoki, ntabwo haratangazwa abakinnyi bazahagararira u Rwanda ndetse n'Umutoza uzabatoza.

Gusa, mu bihe bitandukanye, hakunze kwiyambazwa Ikipe igizwe na: Ntagengwa Olivier ufatanya na Akumuntu Kavalo Patrick mu kiciro cy'abagabo, ndetse n'iya Munezero Valentine ufatanya na Mukandayisenga Benitha.

Mu mpera z'icyumweru gishize, Munezero Valentine na Mukandayisenga Benitha begukanye Shampiyona y'imbere mu gihugu, batsinze Amito Sharon na Musabyimana Penelope ku mukino wa nyuma.

Bitandukanye no mu bagore, mu bagabo ntabwo aba bakinnyi [Ntagengwa Olivier na Akumuntu Kavalo Patrick] bakunze kwitabazwa, bigeze bagaragara muri iyi mikino.

THEUPDATE ifite amakuru ko abakinnyi bazahagararira u Rwanda baza gutangazwa bitarenze kuri uyu wa Kane tariki ya 19 Kamena [6] 2025.

Amafoto