Mutabazi Yves yasinye amasezerano y'igihe gito muri APR VC

Yves Mutabazi yashyize umukono ku masezerano y'amezi atandatu (6) akinira Ikipe y'Ingabo z'u Rwanda, APR Volleyball Club.

APR Volleyball Club yamuhaye aya masezerano, nyuma yo gushima umusaruro yayeretse mu mikino ya “Medwell Tournament”, irushanwa ribanzirinza itangira rya Shampiyona.

Ntabwo ari ku nshuro ya mbere uyu mukino agiye gukinira APR Volleyball Club, kuko yayinyuzemo hagati ya 2013 na 2018, mbere yo kwerekeza mu yandi makipe y'imbere mu gihugu, arimo “Gisagara VC, REG VC na Kepler VC”.

Uretse imbere mu gihugu, Mutabazi yavuye muri APR VC yerekeza mu Ikipe ya Niksar VC, muri Shampiyona y'Igihugu cya Turkiye.

Mu Myaka itanu (5) yakiniye APR VC mbere yo kuyivamo, yayifashije kwegukana ibikombe bitandukanye, birimo n'icya Shampiyona yo mu 2014.

Icyo gihe, iyi Kipe y'Ingabo z'u Rwanda, yayoborwaga na Colonel (Rtd) Muyango Jean Bosco, kuri ubu usigaye ayobora Ikipe y'abagore (APR WVC).

Mbere yo kwerekeza muri APR VC, Mutabazi yakinaga umukino wa Volleyball mu makipe y'Ibigo bibiri (2) yiseho Amashuri yisumbuye, aribyo “APACE-Kabusunzu” yize ikiciro cya mbere cy'Amashuri yisumbuye na  Groupe Scolaire Officiel de Butare (GSOB), yize ikiciro cya kabiri. 

Nyuma yo gushyira umukono ku masezerano, Mutabazi atagerejwe mu Kibuga kuri uyu wa 25 Ukwakira (10) 2025, mu mukino uzahuza APR VC na Kigali Volleyball Club (KVC).

Akimara gushyira umukono ku masezerano, mu kiganiro yahaye Ikinyamakuru The Newtimes, Mutabazi yagize ati:“Nyuma yo kudakina igice cya kabiri cya Shampiyona ishize (2024-25), ubwo nari umukinnyi w'Ikipe ya Kepler VC, nishimiye kongera gukina umukino nkunda. Amasezerano n'ay'igihe gito, ndetse ashobora no kunshyira ku gitutu. Ibi nzabyitwaramo kigabo, kandi ndizeza APR VC yangiriye ikizere, kuzayiha umusaruro inyitezeho”.

Mu mikino y'Irushanwa ribimburira Shampiyona, yafashije APR VC kwegukana umwanya wa gatatu (3), nyuma yo gutsinda REG VC.

Mu mikino ya kimwe cya kabiri (1/2), APR VC yari yasezerewe na Kepler VC, ku ntsinzwi y'amaseti 3-2.

APR VC itozwa na Sammy Mulinge, niyo ibitse Igikombe cya Shampiyona y'i 2024-25, yegukanye itsinze Police VC, imikino 2-1.

Amafoto

Mu myaka 5 yakiniye APR VC, yayifashije kwegukana Shampiyona yo mu 2014

Mu bihe bitandukanye, yakunze guhembwa nk'umukinnyi uhiga abandi, mu marushanwa yitabirwaga n'Ikipe ya APR VC