Ikipe y'Igihugu ya Australia yegukanye Shampiyona y'Isi y’Amagare mu gusiganwa n'igihe

Ikipe y'Igihugu ya Australia yegukanye Shampiyona y'Isi mu rwego rw'amakipe y'Ibihugu mu kiciro  cyo gusiganwa n'igihe, ibizwi nka Team Time Trial Mixed Relay mu ndimi z'amahanga.

Abakinnyi 5 bari bagize Ikipe y'Igihugu ya Australia, bahize abandi nyuma yo gukoresha Iminota 54, Amasegonda 30 n'iby'Ijana 47, ku ntera ya Kilometero 41 na Metero 800.

Nyuma yo kwitwara neza i Kigali ahari gukinirwa iyi Shampiyona ku nshuro ya mbere muri Afurika n'iya 13 hanze y'Umugabane w'u Burayi, bivuze ko iki gihugu kisubije iyi Shampiyona nk'uko cyari cyabikoze i Zurich mu Busuwisi mu Mwaka ushize [2024].

I Kigali, Australia yakurikiwe n'Ikipe y'Igihugu y'Ubufaransa yasizwe Amasegonda 5 n'iby'Ijana 24, mu gihe Ubusuwisi bwegukanye umwanya wa gatatu busigwa Amasegonda 10.

Ni mu gihe i Zurich, Australia yari yegukanye iyi Shampiyona ikoresheje Isaha, Iminota 12 n'iby'Ijana 52, ku ntera ya Kilometero 53 na Metero 700.

Yahagarariwe n'abakinnyi barimo: Brown Grace, Chapman Brodie, O'Connor Ben, Roseman-Gannon Ruby, Vine Jay na Matthews Michael.

Mu gihe uyu Mwaka, Australia yari ihagarariwe na: MATTHEWS Michael, 2 PLAPP Lucas, VINE Jay, CHAPMAN Brodie, SPRATT Amanda na  WILSON-HAFFENDEN Felicity. 

Yari yakurikiwe n'Ikipe y'Igihugu y'Ubudage n'iy'Ubutaliyani.

Mu gihe Australia yishimiraga kwisubiza iyi Shampiyona, ku ruhande rw'Ikipe y'Igihugu y'u Rwanda ntabwo byagenze neza, kuko yasoreje ku mwanya wa 11 mu bihugu 15.

Abakinnyi b'u Rwanda bari bagizwe na: BYUKUSENGE Patrick, NKUNDABERA Eric, UWIDUHAYE Mike, INGABIRE Diane, NIRERE Xaveline na NYIRARUKUNDO Claudette, basizwe n'aba Australia, Iminota 7, Amasegonda 5 n'iby'Ijana 15.

Ku rwego rw'ibindi bihugu byo ku Mugabane w'Afurika, Ethiopia yasoreje ku mwanya wa 10, Mauritius iba iya 11, Uganda isoreza ku wa 14, mu gihe Benin yaherutse izindi.

Twibutse ko buri Kipe y'Igihugu yari ihagarariwe n'abakinnyi 6, barimo 3 b'abagabo na ba 3 b'abagore.

Ibihugu byakinnye iyi Shampiyona ni: U Rwanda, Benin, Uganda, Ethiopia, Ubushinwa, UCI World Cycling Centre, Ibirwa bya Mauritius, Ukraine, Esipanye, Ububiligi, Ubusuwisi, Ubufaransa, Ubutaliyani, Ubudage na Australia.

Amafoto