Gutinya imyigaragambyo byasunikiye Guverinoma gufunga Imbuga nkoranyamanga

Abaturage bo mu gihugu cya Gabon ntibari gukoresha Imbuga nkoranyambaga nk'uko byari bisanzwe, nyuma y'uko zafunzwe tariki ya 18 Gashyantare (2) 2026.

Ibiro ntaramakuru by'Abafaransa (AFP) ndetse n'imiryango itegamiye kuri Leta, byatangaje ko Imbuga nkoranyambaga zirimo Facebook na TikTok biri mu byafunzwe.

Gufunga izi mbuga, bishingiye ku bwoba bw'Imyigaragambyo yateguwe n'abaturage mu rwego rwo kwamagana uko Igihugu kiyobowe.

Akomoza kuri aya makuru mu kiganiro na Radiyo mpuzamahanga y'Abafaransa (AFP), Théophane Nzamé-Nzé-Biyoghe, Umuvugizi wa Perezida wa Gabon, yagize ati:“Ibimaze iminsi bikorwa mu rwego rwo kutishimira ubuyobozi buriho, nibyo basunikiye Guverinoma gufata iki kemezo”.

Ibyatangajwe na Théophane byahise bisamirwa hejuru n'abatavuga rumwe n'Ubutegetsi.

Alain-Claude Bilie-Bi-Nze wahoze ari Minisitiri w'Intebe ndetse akaba anakuriye Ishyaka rya Together for Gabon (Twese hamwe ku bwa Gabon), yavuze ko ibikorwa na Guverinoma bigamije kuniga ubwisanzure abaturage bahabwa n'Itegeko nshinga.

Ku wa Kabiri w'iki Cyumweru tariki ya 17 Gashyantare (2) 2026, urwego rushinzwe kugenzura Itangazamakuru muri Gabon (HAC), rwari rwatangaje ko izi mbuga nkoranyambaga zafunzwe kugera igihe kitazwi.

HAC yavuze ko muri iki gihe, izi mbuga zifashishwa n'abatavuga rumwe n'Ubutegetsi mu gukwirakwiza ibihuha ndetse no guhembera inzangano.

Nk'uko Imiryango itegamiye kuri Leta ibivuga, Facebook, TikTok na WhatsApp nizo mbuga nkoranyambaga ziza ku isonga mu gukoreshwa cyane, zikunganirwa na YouTube ndetse na Instagram.

Mu gihe kitageze ku Mwaka atorewe kuyobora Gabon, bivugwa ko Perezida Brice Oligui Nguema ari ku nshuro ya mbere ahuye na kimwe mu bijegeza Ubutegetsi bwe.

Iyi myigaragambyo afitiye ubwoba, irimo iy'Abarimu ndetse n'abaturage bavuga ko mu gihugu ibintu bitameze neza.