Rwanda: MINEDUC yatangaje itariki y'itangira ry'Umwaka mushya w'Amashuri

Nyuma y'uko Abanyeshuri bagiye kumara hafi Amezi Atatu bari mu Biruhuko, igihe cyo gusura ku Mashuri cyatangiye kwegereza.

Kuri iki Cyumweru, Minisiteri y'Uburezi [MINEDUC], yatangaje itariki y'itangira ry'Umwaka w'Amashuri w'i 2025-26.

Mu itangazo yanyujije ku rubuga nkoranyambaga rwa X yahoze ari Twitter, MINEDUC yavuze ko Umwaka w'Amashuri w'i 2025-26 uzatangira tariki ya 08 Nzeri [9] 2025.

Yaboneyeho kumenyesha abakoze Ibizamini bya Leta bisoza Umwaka wa 6 w'Amashuri Abanza n'uwa 3 w'Amashuri yisumbuye, ko amanota azatangazwa ku wa Kabiri w'Icyumweru gitaha tariki ya 19 Kanama [8] 2025.

Mu mwaka w’Amashuri w'i 2024/2025, ibizamini bya Leta byakorewe mu Mashuri 1,595.

Mu cyiciro rusange (O-Level), byakozwe n'Abakandida 149,134 barimo abakobwa 82,412 n'abahungu 66,722.

Naho mu cyiciro cya kabiri cy'amashuri yisumbuye (A-Level) hiyandikishije abakandida 106,364, barimo 101,081 biga mu Mashuri asanzwe, bagizwe n’abakobwa 55,43 n’abahungu 45,646; hakaba n’abakandida bigenga 5,283. 

Mu minsi ishize kandi, Minisiteri y’Uburezi yerekanye ko mu gihugu hose hari Abarimu barenga ibihumbi 120.

Abigisha mu mashuri y’incuke ni 9,252, abigisha mu mashuri abanza ni ibihumbi 26, abigisha mu yisumbuye bakaba ibihumbi 34.