Volleyball: Police yegukanye “Medwell Pre-Season Tournament” itanga ubutumwa mbere ya shampiyona

Amakipe ya Polisi y'u Rwanda, yegukanye “Medwell Pre-Season Tournament”, Irushanwa ribimburira itangira rya Shampiyona.

Mu kiciro cy'abagabo, Police VC yegukanye iri rushanwa inyagiye Ikipe ya Kepler VC ku ntsinzi y'Amaseti 3-0 (25–22, 25–19, 25–21), mu gihe mu kiciro cy'Abagore, Police WVC nayo yihanije APR WVC iyitsinda Amaseti 3-0 (25–20, 25–21, 25–16).

Ikipe ya Police VC yageze ku mukino wa nyuma ikuyemo REG VC, mu gihe Kepler VC yari yasezereye APR VC.

Mu kiciro cy'abagore, Police WVC yageze ku mukino wa nyuma isezereye Kepler WVC ku ntsinzi y'amaseti 3-2, ari nako byagenze kuri APR WVC isezerera RRA VC.

Uretse kwegukana iri Rushanwa, Abakinnyi b'Amakipe ya Police nibo begukanye Igihembo cy'umukinnyi mwiza w'Irushanwa, aho ku ruhande rw'Abagabo cyegukanywe na Angilo Gideon, mu gihe mu Bagore, cyahawe Ndagijimana Iris.

Umwanya wa gatatu mu kiciro cy'abagabo, wegukanywe n'Ikipe ya APR VC yatsinze REG VC, mu gihe mu bagore, Kepler WVC yatsinze RRA VC.

Imikino ya Medwell Pre-Season Tournament yatangiye tariki ya 10 Ukwakira 2025, ikaba yashyizweho akadomo mu ijoro ryakeye.

Yateguwe n'umuryango IMEGH [Initiative for Medical Equity and Global Health] na Supra Event ku bufatanye n'Ishyirahamwe ry'umukino wa Volleyball mu Rwanda [FRVB], hagamijwe gufasha amakipe kwinjira neza mu Mwaka mushya w'imikino [2025-26].

Yitabiriwe n'amakipe yo mu kiciro cya mbere, mu bagabo n'abagore.

Mu makipe y'abagabo, yari agizwe na: Police VC, Kepler VC, APR VC, REG VC, Kigali Volleyball Club (KVC) na EAUR VC.

Mu gihe mu kiciro cy'abagore, hitabiriye amakipe arimo: Police WVC, APR WVC, Kepler WVC, RRA VC na EAUR WVC.

Uretse mu kiciro cy'amakipe yabize umwuga, abakanyujijeho nabo biyibukije ibihe byabo byo ha mbere, mu mukino wahuje bamwe mu bahoze bakinira Ikipe y'Igihugu.

Bigabanyije mu makipe abiri, arimo Ikipe yari igizwe n'abakiniye Ikipe y'Igihugu yari ifite izina rya Legends VC, yacakiranye na Kinyinya VC, nayo yari irimo bamwe mu bakiniye Ikipe y'Igihugu.

Uyu mukino wagoje amaso y'abafana, warangiye Kinyinya VC yatozwaga na Afande Rugambwa Patrice wari wungirijwe na Mana Jean Paul, itsinze amaseti 2-1, Ikipe ya Legends VC yatozwaga na Nsengiyumva JMV, yungirijwe na Julius Kansime Kagarama.

Muri iki kiciro cy'abatarabigize Umwuga, mu makipe y'Ibigo by'ubuzima, Ikipe ya Minisiteri y'Ubuzima (MINISANTE), yegukanye Igikombe itsinze iy'Abayeshuri biga mu Ishami ry'Ubuzima muri Kaminuza mu Rwanda, (MEDSAR) amaseti 3–1 (25–23, 20–25, 25–21, 25–21).

Nyuma yo kwegukana iri rushanwa, Umutoza w'Ikipe ya Police VC, Fred Musoni, yatangarijwe THEUPDATE ko yishimiye uko abakinnyi be bitwaye, kandi bamweretse isura y'uko biteguye kwinjira mu Mwaka mushya w'imikino, n'ubwo yunzemo ko hakiri kare kwemeza ko azatwara Igikombe.

Mu kiganiro na THEUPDATE, Alphonse Nsengiyumva, Umuyobozi wa Supra Event yateguye iri Rushanwa, yavuze ko bishimira uko ryagenze, yungamo ko rizajya rikinwa buri uko Umwaka utashye, yungamo ko bazakora ibishoboka byose, rigakomera kurushaho.

Twibutse ko, Ikipe yegukanye iri Rushanwa yahawe Igikombe, Imidali na Sheke y'Amafaranga Ibihumbi 500 y'u Rwanda, iya kabiri ihabwa Imidali n'Ibihumbi 400 by'Amafaranga y'u Rwanda, mu gihe iya gatatu yahawe Imidali n'Amafaranga Ibihumbi 300 by'u Rwanda.