Rwanda: Abanyamuryango b'Ishyirahamwe rya Volleyball bagiye gutora Komite nyobozi nshya

Abanyamuryango b'Ishyirahamwe ry'Umukino wa Volleyball mu Rwanda [FRVB], bagiye gutora komite nyobozi nshya, izariyobora kugeza mu 2029.

Babyemereje mu nteko rusange ngaruka mwaka yateraniye kuri HillTop Hotel, uyu wa 16 Kanama [8] 2025.

Bemeje ko aya matora yo gusimbura komite nyobozi icyuye igihe, azakorwa tariki ya 20 Nzeri [9] 2025.

Komite icyuye igihe yatowe mu 2021, ikaba yari iyobowe na Ngarambe Raphael.

Nyuma y'Imyaka ine [4], abanyamuryango ntabwo baremeza niba bazongera kumugirira ikizere, n'ubwo nawe ataratangaza ko azongera kwiyamamaza.

Uretse ingingo y'amatora, muri iyi nteko rusange yari iyobowe na Karekezi Leandre, abanyamuryango bemeje ko Umwaka wa Shampiyona y'i 2025-26, uzatangira tariki ya 17 Ukwakira [10] 2025.

Iyi Shampiyona izaba irimo impinduka zitandukanye n'iy'Umwaka ushize, kuko mu mikino ya kamarampaka [Playoffs], imikino yavanywe kuri 3 yari isanzwe, igashyirwa kuri 5.

Umwaka ushize wa Shampiyona, Igikombe mu bagabo cyegukanywe n'Ikipe y'Ingabo z'u Rwanda, APR VC, itsinze iya Polisi y'u Rwanda, Police VC, mu gihe mu bagore, Police WVC yatsinze APR WVC.

Abanyamuryango kandi bemeje ko Ikipe y'Akarere ka Kirehe, Kirehe VC yongera kugaruka mu kiciro, nyuma y'Imyaka 2 ikikuyemo, ku mpamvu yavuze ko zari zatewe n'Ubukungu butari bwifashe neza.

Komite nyobozi icyuye igihe, yatangarije Abanyamuryango ko hatangiwe ibiganiro biganisha ku kuba u Rwanda rwakakira Shampiyona ny'Afurika y'Umwaka utaha [2026] mu Bagabo n'Abagore.

Amafoto

Ngarambe Raphael, yashimiye ikizere Abanyamuryango bamugiriye mu Myaka 4 ishize

Visi Perezida w'Ishyirahamwe rya Volleyball mu Rwanda, Zawadi Geoffrey

Umunyamabanga wa Komite nyobozi icyuye igihe, Mucyo Philbert

Col (Rtd) Muyango, Umuyobozi w'Ikipe ya APR y'Abagore.