Nestor Ntahontuye yagizwe Minisitiri w'Intebe w'u Burundi

Nestor Ntahontuye yagizwe Minisitiri w'Intebe mushya w'u Burundi, asimbuye Garvais Ndirakubuca.

Uyu mugabo wavutse mu 1978, yari usanzwe ari Minisitiri w'Imari n'Imigambi ya Leta kuva mu Kwezi k'Ukuboza mu 2024, yemejwe na Perezida Ndayishimiye Evariste.

Ndirakubuca wari Minisitiri w'Intebe, yahise agirwa Umuyobozi w'Inteko ishinga amategeko, Umutwe wa SENA.

Nyuma yo kugenwa na Perezida Ndayishimiye kuri uyu wa Kabiri tariki ya 05 Kanama [8] 2025, Ntahontuye yemejwe na SENA, yanahise inatora Ndirakubuca.

Ku mugoroba wo kuri uyu wa Kabiri, Ntahontuye yahise arahirira inshingano nshya, imbere y'Inteko inshinga amategeko, Umutwe wa SENA n'uw'Abadepite, mu muhango wabereye mu Ngoro ya Kigobe, i Bujumbura, ahakorera iyi mitwe yombi.

Ishyirwaho rya Ntahontuye, rifatwa nk'Abarundi ndetse n'abasesenguzi ba Politike y'iki gihugu, nk'icyemezo cya Perezida Ndayishimiye kigamije gushyiraho Leta nshya.

Benshi mu bahoze ari Abaminisitiri muri Manda ishize, bakuwe kuri iyo myanya, aho kuri ubu bamwe bagizwe Abadepite, abandi bagirwa Abasenateri.

• Nestor Ntahontuye wagizwe Minisitiri w'Intebe ni muntu ki?

Mbere yo kugirwa Minisitiri w'Intebe, yari asanzwe ari Minisitiri w'Imari n'Imigambi ya Leta kuva mu Kwezi k'Ukuboza mu 2024.

Yagize kuri uyu mwanya, asanzwe ari Umudepite wari uhagaririye agace ka Ruyigi, kuva mu 2020.

Afite Impamyabumenyi y'ikiciro cya gatatu cya Kaminuza [Masters], mu Ibarurishamibare [Statistiques], yakuye muri Kaminuza y'Igihugu y'u Burundi.

Yakoze kandi mu miryango mpuzamahanga itandukanye ikorera mu Burundi, mu mashami ajyanye n'Igenamigambi, kuyikurikirana no gukora ubushakashatsi.