U Rwanda rwatunguye Lesotho mu mikino yo gushaka Itike y’Igikombe cy’Isi

Ikipe y'Igihugu y'u Rwanda y'abagore mu mukino wa Cricket, yatsinze iya Lesotho ku munsi wa mbere w'imikino yo gushaka itike y'igikombe cy'isi, ku rwego rw'Afurika, mu makipe abarizwa muri Diviziyo ya kabiri.

Uyu mukino wakiniwe muri Botswana ahari kubera aya majonjora, warangiye u Rwanda ruwutsinze ku kinyuranyo cya Wiketi 10 [10 Wickets].

Muri uyu mukino, Lesotho niyo yatsinze tombora [Toss], ihitamo gutangira ikubita Udupira ikora amanota, mu gihe u Rwanda rwatangiye ruyibuza kuyakora [Bowling].

Igice cya mbere cy'uyu mukino, cyarangiye abakinnyi: Kananelo Molapo na Paballo Pheko aribo bayifashije kwitwara neza.

Kanenelo yakoze amanota 4 mu dupira 10, mu gihe Paballo yakoze 4 mu dupira 14.

Mu gice cya kabiri cy'uyu mukino, u Rwanda rwagitangiye neza, by'umwihariko rukina Ova 3.1 nta mukinnyi warwo n'umwe urakurwa mu kibuga.

Rubifashijwe na Marie Diane Bimenyimana © wahembwe nk'umukinnyi ahize abandi muri uyu mukino, u Rwanda rwahise rwegukana uyu mukino.

Bimenyimana yatsinze amanota 15 mu dupira 12, mu gihe abandi Merveille Uwase yatsinze 8 mu dupira 7, harimo n'agapira yakozemo amanota 4.

Gutsinda uyu mukino, byahise bafasha u Rwanda kuyobora iri tsinda n'amanota 2.

Mu wundi mukino wakinwe muri iri tsinda, Malawi yatsinze Kameroni ku kinyuranyo cya Runs 38.

Imikino irakomeza kuri uyu wa mbere, u Rwanda rwisobanura na Malawi, mu gihe Kameroni yakira Lesotho.

Imikino ya nyuma y'Igikombe cy'Isi, iteganyijwe kuzakinwa hagati ya tariki ya 12 Kamena [6] n'iya 05 Nyakanga [7] mu Mwaka utaha w'i 2026, ikazakinirwa mu gihugu cy'Ubwongereza.

Ntabwo u Rwanda rurakina imikino y'Igikombe cy'Isi mu kiciro cy'abakuru, gusa, mu 2023, rwitabiriye icy'abatarengeje Imyaka 19 cyakiniwe muri Afurika y'Epfo, bikaba byari no ku nshuro ya mbere rukoze aya mateka.

Marie Diane Bimenyimana yahize abandi mu mukino u Rwanda rwatsinzemo Lesotho.