Tanzaniya: Polisi n’Abasirikare bakwijwe igihugu cyose mu gihe hitezwe imyigaragambyo simusiga

Abapolisi n’abasirikare bakajije umutekano mu gihugu hose, mu rwego rwo gukumira imyigaragambyo iteganyijwe kuri uyu wa kabiri tariki ya 7 Nyakanga (7) 2027.

Ku mihanda, bari kugaragara bitwaje intwaro (Imbunda), zirimo n’izikomeye.

Ibi bibaye mu gihe igihugu cyitegura imurikagurisha rikomeye ry’ubucuruzi rizwi nka ‘Saba Saba’, aho hari impungenge z’uko bamwe bashobora kurikoresha nk’urwitwazo rwo gukora imyigaragambyo.

Saba Saba, ifatwa nka rimwe mu mamurikagurisha afite agaciro gakomeye ku musaruro mbumbe w’ubukungu bwa Tanzaniya.

Guverinoma ya Tanzaniya yavuze ko izafatira ibyemezo bikomeye umuntu wese uzashishikariza abaturage gukora imyigaragambyo cyangwa guteza imvururu.

Izi nzego z’umutekano, zagaragaye mu bice bitandukanye by’Igihugu, birimo mu masangano y’imihanda, mihanda yo mu Mujyi w’ubucuruzi, Dar es Salaam, ndetse no mu yindi Mijyi.

Hari abavuga ko kohereza inzego z’umutekano mu gihugu hose atari ibintu bisanzwe, ahubwo ko ari ingamba zigamije gukumira imyigaragambyo iteganyijwe.

Mu minsi ishize, ku mbuga nkoranyambaga, abaharanira uburenganzira bwa muntu bahamagariye abaturage kwitabira iyo myigaragambyo, basaba ko habaho ubwisanzure muri Politiki ndetse no kubaza abayobozi ibyo bakora.

Ibi kandi byaje bikurikira ubwicanyi bwakozwe mu gihe cy’amatora rusange yo mu 2025.

Iyi myigaragambyo iteganyijwe, ivuzwe mu gihe Guverinoma ya Tanzaniya ivuga ko ifite amakuru y’iperereza agaragaza ko hari abantu bategura kugirira nabi bamwe mu bayobozi, abaturage ndetse no kwangiza imitungo ya Leta n’iya rubanda.