Rwanda: Dr Nsengiyumva wari umuyobozi wungirije wa BNR wagizwe Minisitiri w’Intebe ni nde?

THEUPDATE

Jul 24, 2025 - 09:27

Rwanda: Dr Nsengiyumva wari umuyobozi wungirije wa BNR wagizwe Minisitiri w’Intebe ni nde?

Amakuru THEUPDATE ikesha zimwe mu nyandiko zo mu gihugu cy'Ubwongereza, agaragaza ko Dr. Justin Nsengiyumva ari Umugabo w'Imyaka 54 y'amavuko.

Yaraye agizwe na Perezida Kagame, Minisitri w'Intebe wa 12 w'u Rwanda.

Nyuma yo guhabwa uyu mwanya, yagize ati:“Nkwijeje gukorera inshingano zanjye nciye bugufi n'ubwitange…Nzatanga ibyo nshoboye byose kugira ngo Igihugu gikomeze gutera imbere”.

Ayo ni amagambo ya Dr Justin Nsengiyumva mu butumwa yanditse ku rubuga X ashimira Perezida Paul Kagame waraye amugize Minisitiri w'intebe mushya w'u Rwanda.

Dr. Edouard Ngirente wasimbuwe ku mwanya yari amazeho Imyaka umunani, yanditse kuri X agira ati:“Amahirwe wampaye [Perezida Kagame] yo gukorera igihugu cyanjye… Yakomeje avuga ko ari igika cy'ubuzima bwe azagendana iteka afite ishema”.

Ubwo yatangazwaga ko yagizwe umukuru wungirije wa Banki Nkuru y'u Rwanda mu ntangiriro z'uyu mwaka, hari hashize imyaka irenga 15 atavugwa nyuma y'uko avuye mu Rwanda mu buryo butavugwaho rumwe mu 2008.

Icyo gihe ubwo yari Umunyamabanga Uhoraho muri Minisiteri y'Uburezi mu Ugushyingo [11] 2008, yatawe muri yombi n'urwego rwakoraga iperereza ku byaha rwitwaga Criminal Investigation Department [CID] akekwaho ruswa, yafunzwe igihe kigera ku cyumweru, ntabwo yaburanishijwe.

Mbere y'uriya mwanya muri Minisiteri y'uburezi, Nsengiyumva yari yarabaye Umunyamabanga uhoraho muri Minisiteri y'ubucuruzi n'inganda.

Amakuru avuga ko avuye mu Rwanda, Dr. Nsengiyumva yagiye muri Kenya akiga Master's mu ishami rya Economic Policy & Management muri University of Nairobi hamwe na 'Degree' mu ubucuruzi muri Catholic University of Eastern Africa [CUEA] nayo yo muri Kenya, nk'uko bigaragara ku mwirondoro we.

Dr. Nsengiyumva, yakomereje amashuri mu Bwongereza aho yigiye impamyabumenyi y'ikirenga [PhD] mu bijyanye n'ubukungu muri University of Leicester.

Muri iki gihugu, yahaboneye ubwenegihugu, yahakoze imirimo itandukanye mbere yo kugaruka mu Rwanda mu ntangiriro z'uyu mwaka, irimo;

Inzobere nkuru mu bukungu mu kigo gishinzwe inzira za gariyamoshi n'imihanda muri Minisiteri y'ubwikorezi mu Bwongereza
Inzobere mu bukungu muri minisiteri y'umurimo na pansiyo muri leta y'Ubwongereza

Umwirondoro we uvuga ko afite ubunararibonye mu bugenzuzi bw'ibigendanye n'ubukungu, politiki za Leta, n'imitegekere y'inzego za Leta. Inyandiko zimwe zo mu Bwongereza zigaragaza ko Dr. Nsengiyumva ubu afite imyaka 54.

Mu mwirondoro we watangajwe na Banki Nkuru y'u Rwanda nyuma y'uko mu kwezi kwa Gashyantare [2] agizwe umuyobozi wayo wungirije, bavuga ko ubwo yari umunyamabanga uhoraho muri Minisiteri y'uburezi yayoboye kandi yakoranye n'abandi mu gushyira mu ngiro politike ya leta yo guhindura uburezi bw'u Rwanda bukava mu Gifaransa bujya mu Cyongereza.

Nyuma y'uko avuye muri Ministeri y'uburezi akava no mu Rwanda, yongeye kuvugwa mu ntangiriro z'uyu mwaka ubwo yagirwaga umukuru wungirije wa Banki Nkuru y'u Rwanda.

Minisitiri w'intebe mu Rwanda, ni we uba ari umukuru wa guverinoma, ashyirwaho kandi akavanwa ku mirimo na Perezida wa Repubulika, nk'uko abyemererwa n'Itegeko Nshinga.

Kugeza ubu nta mpamvu izwi Perezida Paul Kagame yakuyeho Dr. Edouard Ngirente akamusimbuza Dr Nsengiyumva.

Ingingo ya 124 y'Itegeko Nshinga ry'u Rwanda ivuga ko iyo Minisitiri w'Intebe yeguye cyangwa avuyeho ku mpamvu iyo ari yo yose, bituma n'abandi bagize Guverinoma begura.

Abaminisitiri, Abanyamabanga ba Leta n'abandi bagize Guverinoma bashyirwaho bitarenze iminsi 15 nyuma y'ishyirwaho rya Minisitiri w'Intebe.

Abo, itegeko rivuga ko "bashyirwaho na Perezida wa Repubulika amaze kugisha inama Minisitiri w'Intebe".

Muri iyo minsi 15 uhereye ubu byitezwe ko hazashyirwaho abagize guverinoma, gusa nta mpinduka nini zitezwe, kereka gutungurana.

Dr. Nsengyumva abaye Minisitiri w'intebe wa 12 w'u Rwanda: