DR – Congo yinjiye mu mikoranire na AS Monaco

Ikipe ya AS Monaco yo kiciro cya mbere muri Shampiyona y'Ubufaransa izwi nka League 1, yinjiye mu mikoranire na Repubulika ya Demokarasi ya Congo.

Binyuze muri ‘DR – Congo, Heart of Africa’, aya masezerano yatangajwe kuri uyu wa 28 Kamena [6] 2025 na Minisiteri ya Siporo n'Imyidagaduro muri Repubulika ya Demokarasi ya Congo, yavuze ko azageza mu 2028.

Agamije kumenyekanisha Repubulika ya Demokarasi ya Congo ndetse no guteza imbere impano za Siporo mu bakinnyi bato bo muri Repubulika Iharanira Demokarasi ya Congo.

Aya masezerano kandi avuga ko AS Monaco izajya yamamaza Repubulika ya Demokarasi ya Congo binyuze ku mbuga nkoranyambaga zayo, kugira ngo umubare w'abasura iki gihugu wiyongere.

Biteganyijwe ko guhera mu mwaka utaha w'imikino [2025-26], AS Monaco izajya yamamaza Repubulika ya Demokarasi ya Congo ku myambaro yayo, haba iyo yambara muri Shampiyona ndetse n'iyo izajya ikinana mu mikino ya UEFA Champions League.

Uretse Ikipe nkuru ya AS Monaco, amakipe y'abakiri bato [U-19 na U-21], nabo bazajya bambara iyi myenda igaragaza ibirango bya Repubulika ya Demokarasi ya Congo.

Mu gushimangira aya masezerano, AS Monaco izashinga irerero [Academy] ryigisha umupira w'amaguru mu duce dutandukanye muri Repubulika ya Demokarasi ya Congo.

Amakuru THEUPDATE yabonye, n'uko buri Mwaka, Repubulika ya Demokarasi ya Congo izajya yishyura AS Monaco Miliyoni 1 n'Ibihumbi 600 by'Amadorali y'Amerika, mu gihe aya masezerano yose hamwe afite agaciro ka Miliyoni 4 n'Ibihumbi 800 by'Amadorali y'Amerika.

Abakurikiranira hafi ibibera muri Repubulika ya Demokarasi ya Congo, bavuga ko gusinya aya masezerano, yabikomoye ku yo u Rwanda rwasinyanye n'amakipe arimo: Arsenal, Paris Saint Germain [PSG], FC Bayern Munchen, aya akaba yarafashije u Rwanda kurushaho kwigarurira imitima y'abavuye imihanda yose.

Bityo ko aya masezerano, azafasha Rebupurika ya Demokarasi ya congo kuzamura isura yayo ku ruhando mpuzamahanga.

AS Monaco n'imwe mu makipe y'ubukombe mu Burafansa, ikaba ari mwe mu zakinnye umukino wa nyuma wa UEFA Champions League yahuyemo na FC Porto mu 2004.

Iyi kipe yo mu Bwami bwa Monaco, izwiho kuba ariyo yamuritse impano ya kizigenza w'Abafaransa muri ruhago kuri ubu, Kylian Mbappé.

Umwe mu bakinnyi bafite aho bahuriye na Repubulika ya Demokarasi ya Congo bakinnye muri AS Monaco ni Shabani Christophe Nonda, wayikiniye hagati y'Umwaka w'i 2000 kugeza mu 2005.

Amafoto