Burera – Cyeru: CSP Ngendahimana yasabye abaturage kwirinda Ibiyobyabwenge kuko byangiza ubuzima

Umuyobozi wa Polisi wungirije mu Ntara y’Amajyaruguru, Chief Superintendent of Police (CSP) Prudence Ngendahimana yasabye abaturage b'Umurenge wa Cyeru ho mu Karere ka Burera, kwirinda no kugendera kure Ibiyobyabwenge, kuko byangiza ubuzima bw'ababikoresha.

CSP Ngengahimana yabigarutseho mu kiganiro yahaye abaturage bari bitabiriye inteko mu Kagali ka Ruyange.

Muri iki kiganiro cyo ku wa 20 Mutarama (1) 2026, yabasobanuriye ingaruka zo gutunda, gukwirakwiza, gucuruza no kunywa Kanyanga, urumogi n'ibindi biyobyabwenge; abasaba kubyirinda no kugira uruhare mu kubirwanya bigisha ababikora kubireka; abinangiye bakanga kubireka; bakabatangira amakuru.

Yagaragaje ko Ikiyobyabwenge ari ikintu cyose iyo kinjiye mu mubiri w’umuntu gihindura ubushobozi bwe mu bijyanye no gutekereza, gufata icyemezo, ndetse kikanahindura imikorere y’umubiri we bikangiza ubuzima bwe.

Ati:“Ibiyobyabwenge bitera ababinywa gukora ibyaha birimo gukubita no gukomeretsa, ubujura, gufata ku ngufu, gusambanya abana n’ihohotera ry’ubwoko bunyuranye. Gukora ibyo byaha ndetse n’ibindi ntarondoye babiterwa n’uko biba byabayobeje ubwenge; bagakora ibyo batatekerejeho”.

Yunzemo ati:“Ibiyobyabwenge bitera ababinywa indwara zinyuranye; kandi bikenesha ababyishoramo kubera ko iyo bifashwe biramenywa; ibindi bigatwikwa. Hari n’ubwo ababitunda bahura n’inzego z’umutekano cyangwa inzego z’ibanze bakabikubita hasi bakiruka. Ayo ni amafaranga baba bakubise hasi”.

“Umuntu uhamwe n’icyaha cyo kwishora mu biyobyabwenge arafungwa; kandi agacibwa amande. Ibyo, hamwe n’ibindi bitera igihombo umuntu ubyishoramo; bikadindiza iterambere rye, iry’umuryango we, ndetse bigira ingaruka ku iterambere ry’Igihugu. Ndabasaba kwirinda ibiyobyabwenge aho biva bikagera”.

Umuntu urya, unywa, witera, uhumeka cyangwa wisiga mu buryo ubwo ari bwo bwose ibiyobyabwenge bito cyangwa urusobe rw’imiti ikoreshwa nka byo, aba akoze icyaha. Ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko aba akoze icyaha.

Igikorwa cyose kijyanye no gucuruza, guhinga, gutundisha, guhindura ibiyobyabwegwe bikoreshejwemo cyangwa binjijemo umwana gukora iyo mirimo bigakorerwa mu gihugu imbere cyangwa bigakorwa ku rwego mpuzamahanga, uwinjije umwana muri icyo gikorwa ahanishwa igihano cy’igifungo cya burundu n’ihazabu y’amafaranga y’u Rwanda arenze miliyoni mirongo itatu ariko atarenze miliyoni mirongo itanu z’amafaranga y’u Rwanda.