Amajyepfo: Guverineri Kayitesi yasabye gukurikiranira hafi imitangire ya serivise zigenewe abaturage

Umuyobozi w'Intara y'Amajyepfo, Alice Kayitesi, yasabye abayobozi bo muri iyi Ntara, gukurikiranira hafi imitangire ya serivisi zigenewe abaturage.

Yabigarutseho kuri uyu wa Kabiri, mu nama nyunguranabitekerezo y’ihuriro ry’abafatanyabikorwa mu iterambere ku rwego rw’Intara “JADF” (Joint Action Development Forum), yateraniye mu Karere ka Huye.

Yari igamije gusuzuma imiterere n’icyerekezo cy’imitangire ya serivisi mu Ntara ndetse no gutanga umurongo wo gukomeza kunoza imikorere y’ubuyobozi bw’Intara n’Uturere tuyigize. 

Abayitabiriye bamurikiwe ishusho y’imiyoborere n’imitangire ya serivisi mu Mwaka wa 2024–25 mu Turere umunani tugize iyi Ntara.

Kayitesi yasabye abayitabiriye gukurikiranira hafi imitangire ya serivise zigenewe abaturage.

Muri iyi Ntara, raporo ya RGB yerekanye ko hari byinshi byakozwe neza ariko igaragaza n’ahakigaragara imbaraga nke.

Mu hakigaragara imbaraga nke, harimo ibijyanye no “Gutanga serivisi z’ubuhinzi, iz’ubutaka n’amashyamba, ubugenzuzi bw’isuku mu nzego za Leta no gukurikirana imishinga y’iterambere”.

RGB yerekanye uko serivisi zitangwa mu nzego zitandukanye z’Igihugu, harimo iz’ubuzima, uburezi, imiyoborere, umutekano, ubuhinzi, ubutaka n’amashyamba, ndetse n’uburyo abaturage babona izi serivisi mu buzima bwa buri munsi.

Ibyavuye mu igenzura byerekanye ko imitangire ya serivisi muri rusange iri ku gipimo kiri hejuru ariko hakigaragara ahakwiye kongerwamo imbaraga kugira ngo abaturage bose bahabwe serivisi zihuse kandi zujuje ubuziranenge harimo no kunoza imikorere y’ubuhinzi na serivisi z’ubutaka n’amashyamba zisabwa n’abantu benshi. 

Guverineri Kayitesi Alice yavuze ko n'ubwo hari intambwe imaze guterwa mu gutanga serivisi nziza ku baturage, abayobozi bagifite inshingano yo gukurikirana isuku mu nzego zose z’ubuyobozi no kugaragaza urugero rwiza kuva ku mubiri ku mitangire ya serivisi. 

Mu kiganiro n’abanyamakuru, asubiza ku bijyanye n'ibipimo biri hasi ku mitangire ya serivise, yagize ati:“Bigaragaza ko ibyo dukorera abaturage babibona”.

Yunzemo ati:“Nyuma y'iyi nama, tugiye kwibanda cyane kuri serivise z'ubuhinzi, ubutaka n'amashyamba cyane ko zisabwa n'abantu benshi ndetse no kwita ku mutekano w'abantu n'ibyabo”.

Akomoza ku mutekano w'abaturage n’ibyabo, yavuze ko bigomba kuza mu by'ibanze, kuko ari wo soko ya byose.

Amafoto

Guverineri Kayitesi yacyebuye abayobozi bo mu Ntara y'Amajyepfo

Guverineri Kayitesi na Dr. Félicien Usengumukiza, umuyobozi mukuru wungirije wa RGB.