Abakinnyi bazahagararira u Rwanda muri Shampiyona ny’Afurika batangiye gukarishywa

Ishyirahamwe ry'umukino wa Karate mu Rwanda [FERWAKA], ryatagiye gutyaza abakinnyi bazatoranywamo abazahagararira Igihugu muri Shampiyona ny'Afurika ya Karate.

Iyi Shampiyona iteganyijwe kuzabera i Abuja hagati ya tariki ya 22-27 Nyakanga [7] 2025.

Izakinwa mu buryo burimo Kata [Kwiyereka] na Kumite [Kurwana].

Abakinnyi 41 nibo bitabiriye iri jonjora ry'ibanze ryakoreshejwe n'Umutoza w'Ikipe y'Igihugu, Christian Kamuzinzi, tariki ya 23 Kamena [6] 2025.

Uko ari 41, bari mu byiciro by'Imyaka bitandukanye, birimo icy'abari hagati y'Imyaka 14-15, abari hagati y'Imyaka 16-17 n'ikiciro cy'abakinnyi bakuru.

Mu kiciro cy'abafite Imyaka 14-15, Ikipe yari igizwe n'abahungu batatu n'abakobwa batatu.

Mu kiciro cy'abari hagati y'Imyaka 16-17, abahungu bari batatu n'abakobwa bane.

Mu gihe mu kiciro cy'abakinnyi bakuru, abakobwa bari 9 mu gihe abahungu bari 19.

Aba bakinnyi batoranyijwe mu bandi 79 nk'uko byagarutsweho n'Umutoza w'iyi Kipe, Christian Kamuzinzi.

Yagize ati:“Nyuma yo gutoranya 41 bavuye muri 79, urutonde ntakuka rw'abazahagararira Igihugu, turateganya kurutangaza bitarenze tariki ya 10 Nyakanga [7] 2025”. 

Yakomeje agira ati:“Mu kiciro cy'Ingimbi n'Abangavu, tuzahitamo umukinnyi umwe uzaba warushije abandi. Mu bakinnyi bakuru, turateganya kuzasigarana abakinnyi 7 b'abahungu na 4 b'abakobwa”.

Kamuzinzi yakomeje avuga ko iyi mibare ari iy'agateganyo, ko ibintu bishobora guhinduka mu gihe icyo aricyo cyose.

Abakinnyi batoranyijwe bagizwe na:

• Ikiciro cy'abakinnyi bafite Imyaka iri hagati ya 14-15

Abahungu: Fred Irampaye, Ferdinand Agnus Ngoga na Andy Kayisire. Aba bakinnyi bose bakaba ari abo mu Ikipe ya Petit Samourai.

Abakobwa: Kesia Isingize Mucyo w'Ikipe ya The Champions, Emelyse Mwiza Umumararungu w'Ikipe ya Flying Eagle na Praxeda Twagirimukiza w'Ikipe ya Petit Samourai.

• Ikiciro cy'abakinnyi bafite Imyaka iri hagati ya 16-17

Abahungu: Sacha Muhire Ngabo w'Ikipe ya Yamatsuki, Prince Ndayizeye w'Ikipe ya Petit Samourai na Credo Armand Byusa Kabagema w'Ikipe ya The Great Karate Academy.

Abakobwa: Aline Irakoze, Caline Irakoze, Emelyne Habimana na Judith Umurerwa bose b'Ikipe ya Flying Eagle.

• Ikiciro cy'abakinnyi bakuru

Abahungu: Fiston Ntwali, Mike Ndutiye Shyaka, Jean Claude Munyaburanga, Omar Usengimana, Mussabu Dukundimana, Arthur Ngoga Muhigirwa na Jean de Dieu Fils Ishimwe bose bo mu Ikipe ya The Great Warriors.

Khalifa Niyitanga, Sharifu Dushime, Sidike Niyonkuru, Paul Kagimbi, Beltert Udahemuka na Fravien Munyaneza bo mu Ikipe ya APR.

Harimo kandi: Marthie Nigena, Emmanuel Ishimwe, Gilbert Niyotwizera na Fiston Niyonkuru bo mu Ikipe ya Mamaru.

Mupenzi Rutikanga w'Ikipe ya Zanshin yo mu Karere ka Huye na Moses Kumbisho Rutareka wo mu Ikipe ya Agahozo Shalom.

Abakobwa: Razia Uwase, Sandrine Ishimwe na Paremonique Abayisenga bo mu Ikipe ya APR.

Yvette Umurisa, Joselyne Niyonkuru na Rose Mary Uwayisenga bo mu Ikipe ya Flying Eagle.

Hari kandi: Lucie Yezakuzwe na Ornella Irakoze bo mu Ikipe ya Agahozo Shalom na Selaphine Mbabazi wo mu Ikipe ya The Great Warriors.

Muri iyi mikino izabera muri Nijeriya, abakinnyi bazayitwaramo neza, bazahita bakatisha itike yo guhagararira Umugabane w'Afurika muri Shampiyona y'Isi.

Mu mikino nk'iyi yo mu 2018 yabereye i Kigali igakinirwa muri Intare Conference Arena, Maic Shyaka Ndutiye yegukanye Umudali wa Zahabu mu bakinnyi batarengeje Imyaka 17.

Uyu Mudali wari usobanuye byinshi mu rugendo rwa Karate y'u Rwanda ku rwego mpuzamahanga, kuko ari ku nshuro ya mbere umukinnyi w'Umunyarwanda yari awegukanye.

Amafoto

Umutoza w'Ikipe y'Igihuu ya Karate, Kamuzinzi, yavuze ko intego ari ukuzegukana Imidali