Amafoto: Flying Eagles yegukanye 'Zanshin Karate Championship' mu batarengeje Imyaka 18

Ikipe ya  Flying Eagles Karate Do yo mu Karere ka Gasabo mu Mujyi wa Kigali, yegukanye 'Zanshin Karate Championship' mu kiciro cy'Abakarateka bari munsi y'Imyaka 18.

Iri rushanwa ritegurwa na Zanshin Sport Solutions ku bufatanye n'Ishyirahamwe rya Karate mu Rwanda, Ferwaka, ryakiniwe kuri Hotel Credo mu Karere ka Huye mu Ntara y'Amajyepfo y'u Rwanda, hagati ya tariki ya 16 na 17 Kanama [8] 2025.

Ryakinwe rikurikira iry'abakinnyi bakuru ryabaye hagati ya tariki ya 09 n'iya 10 Kanama [8] 2025, ryegukanywe n'Ikipe ya APR Karate – Do.

Ryitabiriwe n'Abakarateka bari munsi y'Imyaka 10 mu bahungu n'abakobwa, ndetse n'Ingimbi n'Abangavau.

Flying Eagles yaryegukanye nyuma yo gukusanya Imidali 13, irimo 6 ya Zahabu, 2 ya Silver n'i 5 ya Bronze.

Yakurikiwe n'Ikipe ya The Champions Sports Academy, yakusanyije Imidali 11, irimo 6 ya Zahabu n'i 5 ya Bronze.

Umwanya wa gatatu muri iri rushanwa, wegukanywe n'Ikipe ya Mukusho Karate Kenya yo mu gihugu cya Kenya, yakusanyije Imidali 14, irimo 4 ya Zahabu, 5 ya Silver n'i 5 ya Bronze.

Ikipe ya Zanshin Karate Academy iyoborwa na Sensei Mwizerwa Dieudonne, Umuyobozi wa Zanshin Sport Solutions itegura iri rushanwa, yegukanye umwanya wa 7, nyuma yo gukusanya Imidali 5, irimo 1 wa Zahabu, 2 ya Silver n'i 2 ya Bronze.

Muri uyu wa Mwaka, Zanshin Karate Championship mu kiciro cy'abatarengeje Imyaka 18, yakinwaga ku nshuro ya 3, kuva yatangira gukinwa mu 2023.

Yitabiriwe n'amakipe 23, yakusanyije yose hamwe Imidali 28 ya Zahabu, 28 ya Silver na 50 ya Bronze.

Nyuma yo kwegukana iri rushanwa, Umutoza w'Ikipe ya Flying Eagles Karate Do, Habakwizera Antoine Marie Claret, mu kiganiro n'Itangazamakuru yagize ati:”Twishimiye kwegukana iri rushanwa ku nshuro ya gatatu twikurikiranya. Zanshin Karate Championship, n'irushanwa tuzi ko rikinwa buri Mwaka kuva mu 2023, bityo iyo rirangiye, dutangira kwitegura irikurikiyeho kandi tukarizanamo abakinnyi beza dufite. Niryo banga ryo kutarirekura”. 

”Turashimira ubwitange bwaranze abakinnyi bacu bakongera kuduhesha ishema, by'umwihariko Ababyeyi batugirira ikizere bakaduha abana babo [Abakarateka], turabizeza ko tuzakomeza gukora ibishoboka byose tugaharanira intsinzi”. 

Nkuranyabahizi Noel, Umutoza mukuru w'Ikipe ya The Champions Sports Academy, wanatoje Ikipe y'Igihugu ya Karate mu Myaka ikabakaba 10, yatangarije THEUPDATE ko yanyuzwe n'uburyo iri rushanwa riteguye, ashimira by'umwihariko Sensei Mwizerwa Dieudonne uritegura n'abo bafatanya.

Yagize ati:”Nk'umutoza, nitabira amarushanwa atandukanye, arimo n'ayo ku rwego mpuzamahanga. Iri rushanwa ryatweretse ko Umukino wa Karate umaze gushinga imizi. Gusa, ndasaba Abatoza bagenzi bange gukomeza gushyiramo imbaraga mu guha umubenyi Abakarateka bakiri bato [Munsi y'Imyaka 10], cyane ko Amakipe yo mu gihugu cya Kenya, yatweretse ko hari ibyo aturusha n'ubwo natwe tutari kure yayo”.

Umuyobozi wa Zanshin Sport Solutions, Sensei Mwizerwa Dieudonne, yashimiye Abakarateka basaga 400 bitabiriye iri rushanwa, by'umwihariko abafatanyabikorwa bakomeza kumugirira ikizere bakihatanya nawe muri iyi Myaka itatu ishize, aboneraho no guha amarembo n'abandi babyifuza.

Yaboneyeho no gutangariza abakunzi n'abafana b'Umukino wa Karate mu Rwanda, ko Irushanwa rya Zanshin Karate Championship ry'Umwaka utaha, ruzakinirwa mu Mujyi wa Kigali, bikazaba ari no ku nshuro ya mbere rihakiniwe.

Yavuze ko ari mu rwego rwo kwagura amarembo no kurushaho kurimenyekanisha.

Iri rushanwa kandi ryakurikiranywe n'Umunyamabanga w'Ishyirahamwe rya Karate mu Rwanda, Bugingo Elvis, washimiye Ikipe ya Zanshin Karate Academy yariteguye.

Abafatanyabikorwa b'iri rushanwa, ku isonga barimo; Martin Hardware Ltd, Canal+Rwanda n'abandi.

Amafoto