AMAFOTO: Flying Eagles Karate Club yizihije Imyaka 16 mu byishimo bya Noheri n'Ubunani

Ikipe y'Umukino njyarugamba wa Karate, Flying Eagles Karate Club, yizihije isabukuru y'Imyaka 16 imaze ishinzwe.

Iyi sabukuru yizihijwe tariki ya 26 Ukuboza (12) 2025, yizihizwa mu byishimo by'iminsi mikuru isoza Umwaka, Noheri n'Ubunani.

Nyuma yo gushingwa tariki ya 24 Ukwakira (10) 2009, Flying Eagles Karate Club imaze kugira amashami ane, arimo irikorera i Kagugu n'i Ndera mu Karere ka Gasabo mu Mujyi wa Kigali, irikorera i Nyagasambu mu Karere ka Rwamagana ndetse n'irikorera i Nyamata mu Karere ka Bugesera mu Ntara y'i Burasirazuba.

Kuva mu Mwaka ushize ubwo yizihizaga isabukuru y'Imyaka 15, iyi Kipe yahisemo kuzajya ihuza iyi sabukuru n'irushanwa ryitabirwa n'Abakarateka by'umwihariko abo muri Flying Eagles Karate Club.

Mu kiciro cy'abakobwa, iri rushanwa ryakinwaga ku nshuro ya kabiri, ryegukanywe na Aline Irakoze asimbuye Yezakuzwe Lucie, mu gihe mu bahungu ryatwawe na Nibishaka Fabrice waryisubije.

Uretse iri rushanwa, iyi Sabukuru yaranzwe no kwishimira iby'iyi Kipe yagezeho mu Myaka 16 imaze ndetse n'ibyagezweho muri uyu Mwaka by'umwihariko.

Ashimira abitabiriye iyi Sabukuru by'umwihariko Ababyeyi b'Abana barererwa n'abarerewe muri Flying Eagles, Habakwizera Antoine Marie Claret, washinze Flying Eagles ndetse akaba ari n'Umutoza mukuru wayo, yashimiye abo bafatanyije muri uru rugendo by'umwihariko Muramutsa Cedric, Umuyobozi wa Flying Eagles Karate Club.

Muramutsa yashimiwe uruhare yagize mu guhuza Flying Eagles n'Ubuyobozi bw'inzego z'ibanze by'umwihariko ubw'Akagali ka Kagugu, aho iyi Kipe ifite ikicaro.

Mu bandi bashimiwe, harimo Umuyobozi w'Akagali ka Kagugu, Mazimpaka Patrick, aho hagarutse ku ruhare rw'Akagali n'urwe muri rusange, cyane ko aka Kagali kemeye guha iyi Kipe aho gukorera Imyitozo (Salle) kandi nta kiguzi.

Akomoza kuri aya marushanwa mpuzamahanga, Habakwizera yavuze ko abakinnyi ba Flying Eagles Karate Club bari mu baserukiye Igihugu mu mikino irimo iy'abakiri bato ku rwego rw'Afurika ndetse n'iya Shampiyona ny'Afurika yakiniwe muri Nijeriya mu Mwaka ushize (2024).

Muri iyi mikino, Aline Irakoze yegukanye Umudali wa Feza (Silver) uhabwa umukinnyi wabaye uwa kabiri.

Uretse ku rwego rw'Afurika, Flying Eagles yari ifite abakinnyi babatu (3) bayirerewemo, bahagarariye Igihugu mu mikino yo gushaka itike y'Igikombe cy'Isi yakinwe muri uyu Mwaka.

Habakwizera yashimiye by'umwihariko ubuyobozi bwiza bw'Igihugu cy'u Rwanda ku isonga Perezida wa Repubulika, Paul Kagame, udahwema gukora ibishoboka byose ngo Abana b'Abanyarwanda bagira amahirwe yo gukora Siporo kandi bahagararire Igihugu mu marushanwa mpuzamahanga.

Yasoje yizeza Ishyirahamwe ry'Umukino wa Karate mu Rwanda (FERWAKA), kuzakomeza gukora ibishoboka byose bakaryereka ko ubufatanye buri hagati y'impande zombi buzakomeza guteza uyu mukino imbere.

Mu Myaka 16 imaze ishinzwe, Flying Eagles Karate Club imaze kunyurwamo n'Abakarateka basaga 400.

Amafoto

Habakwizera yashimiye Niyongabo, ku ruhare rwa FERWAKA mu gushyigikira ibikorwa bya Flying Eagles

Mazimpaka Patrick, yijeje Flying Eagles kuzakomeza ubufatanye hagamijwe kurushaho kurera Igihugu

Niyongabo Damien, yashimiye Flying Eagles ku ruhare rwayo mu kurera abakinnyi bahesha ishema Igihugu ku ruhando mpuzamahanga

Damien yahembye Nibishaka wahize abandi mu bahungu, asaba Akagali ka Kagugu ko buri Mudugudu wagira Ikipe ya Karate

Sensei Eustache Ngoga, Umwarimu wigishije Habakwizera yatewe ishema n'uko uwo yigishije yavomye ubumenyi asangiza abandi. Aha, yahembaga umukinnyi wa Flying Eagles Karate Club wiga muri College Saint Andre i Nyamirambo mu Mujyi wa Kigali

Ndayisaba Olivier uhagarariye Ababyeyi bo muri Flying Eagle Sport Academy, yavuze ko batewe ishema n'ibyo iyi Kipe imaze kugeraho mu Myaka 16 imaze

Abatsinze bahembwe Imidari n'ibikoresho by'Ishuri, cyane ko 80% by'abagize Flying Eagles biga mu Mashuri yisumbuye, 15% muri Kaminuza

Muramutsa Cedric, n'umwe mu bafashije Flying Egales gukorera mu Kagali ka Kagugu

Irakoze Aline, yashimiwe nk'umukinnyi wahize abandi mu Myaka 8 amaze muri Flying Eagles

Abitabiriye iyi Sabukuru basangiye Noheri n'Ubunani.