Volleyball: RRA VC mu makipe 17 azitabira ‘Mémorial Kayumba’ ku nshuro ya 16

Ikipe y’Ikigo cy’Igihugu cy’Imisoro n’Amahoro (RRA), RRA VC iri mu amkipe 17 azitabira Tournoi Mémorial Abbé Kayumba Emmanuel, irushanwa ngaruka mwaka ryo kwibuka Padiri Kayumba Emmanuel wayoboye Urwunge rw’Amashuri rw’Indatwa n’Inkesha rwa Butare (GSOB) hagati y’umwaka w’i 1995 kugeza yitabye Imana mu 2009.

Iri rushanwa rigiye gukinwa ku nshuro yaryo ya 16, ritagenyijwe mu mpera z’iki Cyumweru, hagati ya tariki ya 07 n’iya 08 Werurwe (3) 2026.

Rizakinirwa ku bibuga bitandukanye byo mu Mujyi wa Huye by’umwihariko muri GSOB.

By’umwihariko, iri rushanwa rigiye gukinwa mu gihe mu Urwunge rw’Amashuri rw’Indatwa n’Inkesha rwa Butare (GSOB), hakomeje imyiteguro yo kwizihiza Yubile y’Imyaka 100, iteganyijwe mu 2029.

Ubuyobozi bwa GSOB bufite mu nshingano gutegura iri rushanwa, buvuga ko bwamaze kwandikira amakipe yose akina Shampiyona y’ikiciro cya mbere mu bagabo n’abagore buyasaba kuzitabira iyi mikino.

Mu makipe yo mu kiciro cy’abagore, hiyongereyemo Kaminuza y’Imyuga n’Ubumenyingiro ya Kigali (RP-Kigali), nk’imwe mu makipe atabarizwa mu kiciro cya mbere.

Mu kiciro cy’abagabo, Ikipe ya Kaminuza y’Imyuga n’Ubumenyingiro ya Musanze (RP-Musanze), nayo iri mu makipe ategerejwe muri iri rushanwa.

N’ubwo yombi adakina Shampiyona y’ikiciro cya mbere, yayinyuzemo mu myaka ishize.

Ntagihindutse, ikiciro cy’abagore kizitabirwa n’amakipe arimo “RRA VC, APR WVC, Police WVC, Ruhango VC, IPRC Kigali, East Africa University of Rwanda (EAUR WVC) ndetse na Kepler WVC”.

Mu gihe mu bagabo ari “APR VC, Police VC, REG VC, Gisagara VC, Kirehe VC, IPRC Ngoma VC, IPRC Musanze VC, KVC, East Africa University of Rwanda (EAUR VC) ndetse na Kepler VC”.

Ubuyobozi bwa Groupe Scolaire Officiel de Butare (GSOB) buvuga ko gutegura iri rushanwa, bigamije kuzirikana Padiri Kayumba Emmanuel ndetse no gukomeza umurage yagise wo guteza imbere imikino (Siporo), by’umwihariko Volleyball.

Padiri Kayumba wari uzwi nk’Ingwe y’Umweru bitewe n’igitsure yagiraga ariko kigamije gushyira ku murongo Abanyeshuri no kububakamo ikizere cy’ejo hazaza, ni umwe mu bagize uruhare mu guteza imbere Volleyball y’u Rwanda, nyuma ya Jenoside yakorewe Abatutsi mu 1994.

Mu Myaka hafi 14 yayoboye Groupe Scolaire Officiel de Butare (GSOB), iri Shuri ryanyuzemo abakinnyi batandukanye bamenyekanye mu mateka ya Volelyball mu Rwanda ndetse bamwe banakomereza mu Mwuga wo gutoza.

Aba barimo “Kamasa Peter” watoje amakipe atandukanye nka “APR WVC, REG VC, EAUR WVC, RRA VC, ESSA Nyarugunga ndetse na RwandAir VC”.

Mu bandi bakinnyi banyuze muri GSOB, harimo “Nsabimana Mahoro Yvan ukinira Ikipe ya Kepler VC, Mutabazi Yves ukinira APR VC, Dusabimana Vicent ‘Gasongo’ umutoza w’Ikipe ya EAUR VC, Ntagengwa Olivier, Bonny Mutabazi n’abandi…”

Tournoi Mémorial Abbé Kayumba Emmanuel yatangiwe gukinwa mu 2010, yitabirwa n’amakipe atandukanye akina Shampiyona y’ikiciro cya mbere ndetse na Amashuri abanza n’ayisumbuye.

Mu myaka 2 ishize, hiyongereyemo umukino wo gusiganwa ku magare (Cycling), waje usanga uw’abarushanwa mu Koga (Swimming)

Mu mwaka ushize ubwo iri rushanwa ryakinwa ku nshuro ya 15, APR y’abagore yatsinze Kepler amaseti 3-2 (24-26, 25-8, 20-25, 25-13, 15–10) ku mukino wa nyuma, mu gihe mu bagabo, Gisagara yatsinze EAUR amaseti 3-0 (25-20, 25-19, 25-18).

Mu bagore, umwanya wa gatatu wegukanywe n’Ikipe ya RRA itsinze EAUR amaseti 3-1 (25-18, 22-25, 25-18, 25-21).

ishuri rikomeje imyiteguro yo kwizihiza yubile y’imyaka 100 y’iri shuri mu 2029.

Ni umwanya mwiza ku bize, abiga n’abarereye muri GSOB kongera guhura, n’abakunzi ba Volleyball bakishimira impano zabo, ndetse no guha ishema ishuri rikomeje kuba indashyikirwa mu burezi bw’u Rwanda.