Volleyball: Matheus Bettim yongewe muri Police VC yitegura Shampiyona Nyafurika

Ikipe ya Polisi y’u Rwanda mu mukino wa Volleyball, Police Volleyball Club, irimbanyije imyiteguro yo gukina imikino ya Shampiyona Nyafurika iteganyijwe gukinirwa i Kigali hagati ya tariki ya 20 Mata (4) n’iya 03 Gicurasi (5) 2026.

Muri iyi myiteguro, Umunya-Brazil Matheus Bettim, yongewe mu bakinnyi iyi kipe izakoresha.

Matheus wari uteganyijwe kugera i Kigali mu ijoro ryakeye avuye muri Brazil, azahita akomereza mu myitozo Police VC ikorera muri Notre Dame des Anges i Remera mu Mujyi wa Kigali.

Uyu mukinnyi w’imyaka 24 gusa y’amavuko, yari mu bakinnyi Police VC yakoresheje mu mwaka w’imikino w’i 2024-25 ndetse ayifasha kugera ku mukino wa nyuma wa Shampiyona yatsinzwemo na APR VC.

Nyuma y’iyi Shampiyona, yahise asubira muri Brazil, akomereza mu Ikipe ya Viapol Vôlei São José muri Shampiyona y’ikiciro cya mbere ‘Superliga 1’.

Yari yavuye muri Viapol Vôlei São José nyuma y’uko imanutse mu kiciro cya kabiri, nk’uko amakuru THEUPDATE ifite abihamya.

Ni umwe mu bakinnyi bitezweho kuzafasha Police VC muri iyi mikino igiye gukinirwa mu Rwanda ku nshuro ya mbere, cyane ko mu gihe yakiniraga iyi kipe mu mikino mpuzahamahanga, yegukanye igihembo cya ‘Best Server’ mu mikino ya Shampiyona y’Akarere ka gatanu yakinwe mu 2025 ‘2025 CAVB Zone V Championship’.

Uretse Police VC, muri iyi Shampiyona, u Rwanda ruzahagararira n’andi makipe abiri ‘Kepler VC na APR VC’.

Biteganyijwe ko iyi mikino igiye gukinwa ku nshuro ya 47, izitabirwa n’amakipe 27 avuye mu bihugu bitandukanye byo muri Afurika.

Gusa, mu myaka yashize, amakipe ntabwo yakunze kurenga 16, ndetse THEUPDATE ifite amakuru ko amakipe atagomba kurenga 24, keretse hagize igihinduka.

Urutonde ntakuka rw’amakipe azitabira iyi Shampiyona, rutegerejwe tariki ya 10 Mata (4) 2026, nyuma y’umunsi wa nyuma wo kwiyandikisha, uteganyijwe tariki ya 06 Mata (4) 2026.

Amafoto

Matheus Bettim yegukanye igihembo cya Best Server mu mikino y’Akarere ka gatanu